9:208  Christi  carnem,  quae  verbi  coniunctione  vivifica  est,  nos  vitam  in  nobis  habere.  Cur  ergo  ab  incredulis  sine  fructu  comedi  asserunt?  Nam  si  Christi  caro,  ubi  comeditur,  vivifica  est,  eos  qui  in  morte  manent  promiscue  eam  comedere  minime  convenit,  [pag.  197]  Quanquam  hic  monendi  sunt  lectores,  quia  Cyrillo  cum  Arianis  certamen  erat,  eum  ad  hyperbolem  provehi,  ut  doceat  substantialiter  unum  cum  Christo  fieri  fideles,  sicuti  ipse  unum  est  cum  patre.  Eadem  fuit  Hilarii  ratio,  etsi  in  eius  verbis  adeo  nihil  eat  doctrinae  nostrae  contrarium,  ut  apposite  contra  Magdeburgenses  retorqueam.  Veram  carnis  et  sanguinis  naturam  sanctus  vir  his  verbis  probari  contendit:  Caro  mea  vere  est  cibus.  Et  qua  de  re  nobis  hodie  cum  Magdeburgensibus  lis  est,  nisi  quod  illis  immensum  phantasma  carnis  loco  fingentibus  veritatem  defendimus  naturae  humanae,  in  qua  salus  nostra  fundata  est?  Sequitur  apud  Hilarium  :  Haec  accepta  atque  hausta  efficiunt  ut  et  nos  in  Christo,  et  Christus  in  nobis  sit.  Quid  Magdeburgenses?  Incredulos  corpus  Christi  comedendo,  et  sanguinem  bibendo,  alienissimos  tamen  ab  eo  manere.  Dicit  Irenaeus:  Quando  mixtus  calix  et  fractus  panis  percipit  verbum  Dei,  fieri  eucharistiam  carnis  et  sanguinis  [pag.  198]  Christi,  ex  quibus  augetur  et  consistit  carnis  nostrae  substantia.  Quid  ex  voce  eucharistiae  colligi  queat,  viderint  Magdeburgenses.  Mihi  tantundem  valet  atque  mysterium,  quod  ipsi  non  secus  ac  dirum  omen  refugiunt.  Iam  carnem  nostram  spirituali  illo  cibo  et  potu  refici  non  infitior  :  quia  scilicet  in  spem  beatae  resurrectionis  Christo  communicamus,  ideoque  non  anima  solum,  sed  carne  etiam  in  ipsum  coalescere  necesse  est.  Sicuti  et  quisque  nostrum  secundum  carnem  vocatur  membrum  eius,  et  corpus  cuiusque,  templum  spiritus  sancti.  Citant  verba  Cypriani:  Quod  panis  iste  communis  in  carnem  et  sanguinem  mutatus  procuret  corporibus  vitam.  Parum  considerate,  vel  malo  astu  :  quando  styli  diversitas  palam  arguit  non  esse  illum  sermonem  Cypriani.  Ut  tamen  hoc  demus,  cur  expositionem  mox  additam  vafre  subticent?  quod  solus  filius  patri  sit  consubstantialis:  nostra  vero  et  ipsius  coniunctio  nec  misceat  personas,  nec  uniat  substantias,  [pag.  199]  sed  affectus  consociet,  ac  confoederet  voluntates.  Hoc  modo  si  ego  loquerer,  nonne  clamarent  materiam  coenae  auferri?  Sequitur  paulo  post  in  eodem  sermone:  Esus  carnis  huius  quaedam  aviditas  est  ac  desiderium  manendi  in  ipso  :  per  quod  sic  imprimimus  et  eliquamus  in  nobis  dulcedinem  caritatis,  ut  haereat  palato  nostro,  et  visceribus  sapor  dilectionis  infusus,  penetrans  et  imbuens  omnes  animae  corporisque  recessus.  Potus  et  esus  ad  eandem  pertinent  rationem:  quibus  sicut  corporea  nutritur  substantia  et  vivit,  et  incolumis  perseverat,  ita  vita  spiritus  hoc  proprio  alimento  nutritur:  et  quod  est  esca  carni,