50:208  10.  Quicunque  sub  operibus.  Argumentum  est  a  repugnantibus:  nam  ex  eodem  fonte  non  prodeunt  calidum  et  frigidum.  Lex  universos  mortales  sub  maledictionem  includit.  Frustra  igitur  ex  ea  petitur  benedictio.  Ex  operibus  legis  eos  vocat?,  qui  in  illis  constituunt  salutis  fiduciam.  Nam  formulae  istae  loquendi  semper  ad  statum  quaestionis  referri  debent.  Scimus  autem,  hic  disputari  de  causa  iustitiae.  Qui  ergo  iustificari  volunt  legis  operibus,  omnes  esse  maledictioni  obnoxios  pronuntiat.  Sed  unde  id  probat?  Legis  sententia  est,  omnes  qui  ullam  legis  partem  fuerint  transgressi,  maledictos  esse.  Nunc  videamus  an  quisquam  sit  mortalium,  qui  legi  satisfaciat.  Atqui  constat,  neminem  unquam  fuisse  inventum  nec  inveniri  posse.  Omnes  ergo  ad  unum  hic  damnantur.  Deest  autem  hic  minor  et  conclusio:  nam  integer  syllogismus  hic  esset:  Quisquis  in  aliqua  parte  legis  defecerit,  maledictus  est:  omnes  hoc  reatu  tenentur  obstricti:  omnes  igitur  maledicti  sunt  Porro  non  staret  argumentum  hoc  Pauli,  si  vires  nobis  suppeterent  ad  implendam  legem.  Nam  statim  in  minori  daretur  enstasis.  Ergo  vel  Paulus  stulte  ratiocinatur,  vel  hominibus  impossibile  est  legem  implere.  Protinus  enim  exciperet  adversarius:  Fateor  omnes  transgressores  maledictos.  Quid  tum?  reperientur,  qui  legem  observent.  Est  enim  hominibus  libera  electio  boni  et  mali.  Sed  Paulus  extra  controversiam  hic  ponit,  quod  papistae  hodie  pro  execrabili  dogmate  habent:  nomines  viribus  destitui  ad  servandam  legem.  Ita  audacter  concludit,  maledictos  esse  omnes,  quia  sit  omnibus  praeceptum,  legem  in  solidum  servare:  nempe  quia  in  hac  naturae  corruptione  deficit  eos  facultas.  Hinc  colligimus,  quod  lex  maledicit,  esse  accidentia  sed  perpetui  et  inseparabilis.  Nam  a  benedictione  quam  nobis  proponit,  arcet  nos  naturae  nostrae  vitiositas.  Restat  igitur  sola  maledictio.  11.  Quod  autem  in  lege  nemo  iustificetur.  Iterum  a  contrariorum  comparatione  argumentatur,  hoc  modo:  Si  fide  iusti  sumus:  ergo  non  ex  lege.  Sed  fide  sumus  iusti:  ergo  non  ex  lege.  Minorem  probat  testimonio  Habacuc,  quod  etiam  citat  1,  17  capite  ad  Romanos:  maiorem  vero,  diverso  modo  iustificationis.  Lex  enim  tunc  demum  iustificat,  si  quis  impleat  quidquid  praecipit.  Fides  autem  iustificat  eos,  qui  destituti  operum  meritis  in  solum  Christum  recumbunt.  Haec  simul  non  possunt  convenire:  iustificari  proprio  merito  et  aliena  gratia  :  ideo  alterum  evertitur  ab  altero.  Haec  summa  est  :  nunc  singula  membra  exsequamur.  Iustus  ex  fide  vivet.  Quia  locum  hunc  exposuimus  in  epistola  ad  Romanos,  nunc  repetere  non  erit  opus  quidquid  ad  eius  expositionem  pertinet.  Illic  certe  propheta  arrogantem  carnis  fiduciam  verae  fidei  opponit.  Hac  iustos  victuros  pronuntiat:  quo  significat,  non  ad  tempus  eos  modo  sustentari,