1:208  [CO  1.  208]  dixit  (Matth.  17):  ipsum  audite;  sed  quibus  inest  plus  quiddam  ponderis  ac  energiae,  quam  vulgo  existimetur.  Perinde  enim  est,  ac  si  ab  omnium  hominum  doctrinis  adductos,  1)  huic  uni  nos  stitisset,  ab  uno  omnem  salutis  doctrinam  petere  iussisset,  ab  uno  pendere,  in  uno  haerere  denique,  quod  verba  sonant,  uni  auscultare.  Et  sane,  quid  iam  ab  homine  aut  expectari,  aut  expeti  debeat,  ubi  verbum  ipsum  vitae  familiariter  nobiscum  in  carne  nostra  versatum  est?  Nisi  forte  spes  sit,  ab  homine  posse  Dei  sapientiam  superari.  Quin  omnium  hominum  ora  clausa  esse  convenit,  postquam  semel  locutus  est  ille,  in  quo  coelestis  pater  omnes  scientiae  et  sapientiae  thesauros  voluit  esse  absconditos.  Et  sic  quidem  locutus  est,  ut  et  Dei  sapientiam,  quae  nulla  in  parte  hiulca  est,  et  Messiam,  a  quo  om-  [OS  237]  nium  revelatio  expectabatur,  decebat:  hoc  est,  ut  aliis  post  se  nihil  dicendum  reliquerit  (Ioan.  4).  Unum,  inquam,  Christum  tacentibus  omnibus  loqui,  unum  omnibus  omissis  et  contemtis  audiri  oportet.  Hoc  enim  eius  proprium  est,  ut  doceat  quasi  potestatem  habens  (Matth.  7).  Et  nihil  apertius  dici  poterat,  quam  quod  ipse  ait  discipulis:  vos  autem  nolite  vocari  rabbi;  unus  enim  magister  vester  Christus  (Matth.  23).  Deinde, [p. 427]  quo  altius  eorum  animis  verbum  illud  insideret,  bis  eodem  loco  repetit.  Hoc  ergo  unum  apostolis  relictum  est  et  eorum  successoribus  etiamnum  restat,  eam  legem  diligenter  retinere,  qua  eorum  legationem  Christus  limitavit,  cum  iussit:  irent  ac  docerent  omnes  gentes,  non  quae  temere  ipsi  apud  se  essent  fabricati,  sed  quaecunque  ipsis  praeceperat  (Matth.  ult.).  Nec  aliud  aut  sibi,  aut  aliis  reliquit  apostolus  Petrus,  optime  a  magistro  edoctus,  quantum  sibi  liceret.  Qui  loquitur,  inquit,  loquatur  sermones  Dei  (1  Petr.  4).  Quid  hoc  aliud  est,  quam  omnes  humanae  mentis  inventiones,  a  quocunque  tandem  capite  profectae  sint,  arcere,  ut  purus  sermo  Dei  in  fidelium  ecclesia  doceatur  ac  discatur;  omnium  hominum,  cuiuscunque  sint  ordinis,  placita  tollere,  ut  solius  Dei  decreta  statuantur?  Haec  sunt  arma  illa  spiritualia  (2  Cor.  10),  potentia  Deo,  ad  demolitionem  munitionum  quibus  consilia  demoliantur  fidi  Dei  milites  et  omnem  celsitudinem,  quae  extollitur  adversus  cognitionem  Dei,  et  captivam  ducant  omnem  cogitationem  ad  obediendum  Christo,  et  promptam  habeant  vindictam  adversus  omnem  inobedientiam.  En  plane  ac  perspicue  definitam  potestatem,  qua  ecclesiae  pastores  quocunque  demum  nomine  vocentur,  praeditos  esse  convenit,  nempe,  ut  verbo  Dei,  cuius  positi  sunt  ministri  ac  dispensatores,  confidenter  omnia  audeant,  eius  maiestati  omnem  mundi  virtutem,  gloriam,  sublimitatem, [p. 428]  cedere  1)  Omnino  hic  legendum:  abductos  Edd