9:207  207  ULTIMA  ADMONITIO  208  non  difficilis  est  probatio:  idque  magis  enucleate  a  nobis  ostensum  est,  quam  ut  diluto  scommate  obiiciant,  nos  hanc  nucem  dente  nolle  frangere.  Nemo,  inquiunt,  sacramentarius  in  hanc  arenam  adhuc  descendit,  ad  quam  eos  vocavit  Lutherus,  ut  certis  et  firmis  rationibus  ostenderent,  verba  coenae  debere  cum  figura  [pag.  194]  accipi.  Quasi  vero  non  firmae  sint  rationes,  quas  evertere  antehac  frustra  conati  sunt.  Sed  bene  est  quod,  si  surdis  cecinimus,  trecenta  saltem  hominum  millia  revocavimus  ab  errore.  Certe  quum  Catechismo  nostro  praeter  Germanos,  Helvetios,  Italos,  Anglos,  ducenta  hominum  millia  subscribant,  ridicule  Magdeburgenses  sua  surditate  vel  stupore  rationes  suas  obruere  conantur.  Decimum  tertium  argumentum  est  ab  autoritate  vel  consensu  ecclesiae  veteris.  Respondent  Magdeburgenses,  Primam  in  Christo  vetustatem  esse.  Quod  libenter  fatemur.  Sed  quia  removendum  erat,  quo  nos  inique  gravabant,  novitatis  odium,  non  alienum  fuit  ex  piis  scriptoribus  proferre  testimonia:  unde  constaret  non  aliud  hodie  nos  tradere,  nisi  quod  olim  sine  controversia  receptum  erat.  Verum  dilucide  protulit  Christus:  Hoc  est  corpus  meum.  Nempe  ut  nos  dilucide  proferimus.  Sed  perinde  ut  iubemur  [pag.  195]  Christi  dicta  obedienter  amplecti,  ita  fas  est  interpretationem  quaerere.  Unde  enim  huius  sententiae  perspicuitas,  nisi  quum  ad  sacramenti  naturam  accommodatur?  Alioqui  non  modo  spinosa  erit,  sed  etiam  absurditatis  plena.  Sed  patres  ipsi  vocant  saepe  panem  Domini  corpus,  et  vinum  eius  sanguinem.  Modo  de  sensu  conveniat,  nobis  optime  placebit  loquutio  Iam  si  constat  symbolice  panem  illis  fuisse  corpus,  nobis  hauddubie  suffragabitur  eorum  autoritas.  Quoties  mentem  suam  exponunt  patres,  incommoda  illis  aliqua  vox  effluit,  si  Magdeburgensibus  creditur.  Dicas  homines  istos  tantum  sibi  potestatis  sumere,  ut  solo  flatu  nebulas  obducant  toti  mundo.  Nam  quod  statim  de  allegoriis  adducunt,  prorsus  intempestivum  est.  Patres  fateor  allegoriis  fuisse  nimium  deditos.  Sed  hic  quaeritur  quomodo  exposuerint  verba  coenae.  Porro  quum  satis  perspicuum  sit  pulcherrime  inter  nos  convenire,  consensum  hunc  Magdeburgenses  nihil  [pag.  196]  dicendo  offuscant.  Interim  fucum  ex  paucis  veterum  testimoniis  facere  illis  ad  victoriam  sufficit.  Iustinus  panem  et  vinum  per  verbum  precationis  et  gratiarum  actionis,  Christi  carnem  et  sanguinem  nobis  fieri  dicit.  Dicimus  idem  et  nos,  modo  ratio  communicationis  addatur  quae  tunc  ecclesiae  cognita  fuit.  Cyrillus  mysticae  benedictionis  virtute  fieri  docet,  ut  Christus  corporaliter  in  nobis  habitet.  Si  hoc  efficit  mystica  benedictio,  cur  coenam  Domini,  quatenus  in  ea  nobis  datur  eius  corpus,  mysticam  esse  tantopere  antehac  negarunt?  Cur  secundum  eos  ab  esu  corporali  discrepat  mysterium?  Dicit  alio  loco  Cyrillus:  Quando  comedimus