30:207  207  HOMILIA  LXII.  208  quam  virtutis  amore  et  studio  ducuntur.  Nam  triumphare  et  in  theatro  conspici,  atque  ab  omnibus  honorari  cupiunt,  Dei  vero  nullam  rationem  habent.  Ab  isto  furore  David  fuit  alienissimus,  qui  etsi  graviter  ferebat  populi  Israelitici  ignominiam,  non  ea  tamen  tantum  affectus  est  quantum  Dei  gloria,  quam  ab  illo  incircumciso  laedi  audiebat.  Hinc  illae  ipsius  voces,  Deine  viventis  exercitum  incircumcisus  ille  habet  ludibrio  ?  Non  ait,  populine  et  gentis  meae  gloriam,  sed,  illene  viventis  Dei  gloriam  impune  laedet,  sub  cuius  auspiciis  militamus?  Istud  exemplum  imitemur,  ut  si  quod  ecclesiam  Dei  tale  opprobrium  feriat,  non  tantum  alii  aliorum  opprobriis  et  iniuriis  afficiamur,  et  mutuum  auxilium  praebeamus,  sed  maxime  Dei  gloria  moveamur,  quam  rebus  omnibus  pretiotissimis  longe  anteponamus.  Nam,  obsecro,  Deum  ab  improbis  affici  contumeliis,  et  sacrosanctum  ipsius  nomen  conculcari  qua  mente  ferremus?  Nos  ergo  Davidem  imitati,  non  tanti  faciamus  illatas  nobis  iniurias  ab  incredulis,  et  purae  religionis  coniuratis  hostibus,  etsi  vel  in  faciem  despuant,  et  blasphemias  omnes  tanquam  virus  in  nos  evomant,  triumphosque  suos  instituant,  ut  ignominia  et  dedecore  nos  obruant,  ne  inquam  nos  ita  respiciamus,  quin  praecipue  Dei  gloriae  studio  ferveamus,  et  istiusmodi  vituperiis  exponi  doleamus:  et  quod  ait  propheta  Psalmo  69  vere  nobis  tribuatur:  Quia  zelus  domus  tuae  exedit  me,  et  opprobria  probris  assidentium  te  accidunt  mihi.  Ne  itaque  tam  nostri  amantes  simus  ut  nostram  potius  quam  Domini  gloriam  tueri  studeamus,  sed  zelo  potius  gloriae  Dei  exedamur,  ut  si  laedi  ullis  impiorum  vocibus  illam  audiamus,  rumpamur  potius  quam  non  ulciscantur.  Nam  ita  re  ipsa  comprobabimus  nos  vera  esse  Iesu  Christi  Domini  nostri  membra,  quum  Davidem  hac  in  parte  studebimus  imitari,  qui  nostri  capitis  fuit  figura,  cui  nos  etiam  oportet  conformari.  Quod  vero  Goliathum  vocat  incircumcisum,  perinde  est  ac  si  ethnicum  et  incredulum  dicat.  Tunc  enim  Israelitis  circumcisio  idem  erat,  quod  hodie  nobis  baptismus,  nempe  sigillum  quo  Deus  foedus  cum  Abrahamo  initum  obsignaverat,  quod  ad  ipsius  posteros  pertinebat  ,  ut  ab  humani  generis  maledictione  generali  eximerentur.  Quare  observandum  circumcisionem  et  praeputium,  quod  vocant,  populum  et  ecclesiam  Dei  distinxisse  a  reliquis  nationibus,  quae  irae  et  maledictioni  Dei  erant  obnoxiae.  Sin  etiam  hodie  agnoscamus  nos  obsignari  baptismo,  et  admitti  in  filiorum  Dei  numerum,  ut  tantum  beneficium  tanquam  incomprehensibilem  thesaurum  aestimemus  et  quanti  par  est  faciamus.  Nam  baptismus  est  nobis  tessera  divinae  erga  nos  benevolentiae,  quod  in  eo  Christum  Dominum  nostrum  vestiamus,  et  in  illum  inseramur,  ut  omnium  ipsius  bonorum  fiamus  participes.  Quam-