1:207  [CO  1.  207]  est  mea,  sed  eius,  qui  me  misit,  patris  (Ioan.  7).  Hanc  legem,  quam  sibi  Christus  quoque  imposuit,  apostolis  profecto  et  apostolorum  successoribus,  detrectare  nefas  fuerit.  Quanquam  longe  etiam  diversissima  est  ratio.  Ipse  enim  aeternus  ac  unicus  patris  consiliarius,  qui  in  eius  sinu  semper  fuit,  sic  a  patre  accepit,  ut  simul  omnes  scientiae  et  sapientiae  thesauros  habuerit  in  se  reconditos  (Col.  2).  Ex  hoc  fonte  hauserunt  omnes  prophetae,  quidquid  unquam  coelestium  oraculorum  ediderunt.  Ex  eodem  Adam,  Noah,  Abraham,  Isaac,  Iacob  et  alii,  quoscunque  ab  initio  Deus  sui  cognitione  dignatus  est,  hauserunt  et  ipsi  quoque  quidquid  coelestis  doctrinae  didicerunt.  Nam  si  fuit  illud  perpetuo  verum  (ut  certe  fuit)  quod  dicebat  Ioannes  baptista  (Ioan.  1):  neminem  unquam  Deum  vidisse,  sed  unigenitum  filium,  qui  est  in  sinu  patris,  enarravisse  nobis;  et  alterum  ipsius  Christi  verbum  (Matth.  11):  quod  nemo  patrem  viderit,  nisi  filius  et  cui  filius  voluerit  revelare;  quomodo  Dei  mysteria,  aut  animo  comprehendissent,  aut  [OS  236]  elocuti  essent,  nisi  docente  filio,  cui  soli  patent  arcana  patris?  Deum  itaque  non  aliter  cognoverunt  sancti  illi  homines,  quam  ipsum  in  filio,  velut  in  speculo  intuiti,  nec  aliter  de  Deo  vaticinati  sunt  prophetae,  quam  eiusdem  filii  spiritu;  seu  quis  ita  dici [p. 425]  malit:  non  alia  ratione  se  unquam  manifestavit  hominibus  Deus,  quam  per  filium,  hoc  est,  unicam  suam  sapientiam,  lucem  ac  veritatem.  Haec  vero  sapientia  tametsi  sese  antea  variis  modis  exeruerat,  nec  sic  quidem  tamen  adhuc  ad  plenum  elucebat.  Verum  ubi  demum  in  carne  manifestata  est,  quidquid  humana  mente  de  Deo  comprehendi  potest  et  quidquid  cogitari  debet,  pleno  ore  nobis  edisseruit.  Non  enim  profecto  vulgare  aliquid  praedicare  voluit  apostolus  (Hebr.  1),  cum  scripsit:  Deum  olim  multifariam  multisque  modis  patribus  locutum  fuisse  per  prophetas,  at  extremis  his  diebus  nobis  in  dilecto  filio  suo  locutum  esse.  Significat  enim,  imo  aperte  declarat,  Deum  non  posthac,  ut  antea,  per  alios  subinde  atque  alios  locuturum,  nec  prophetias  additurum  prophetiis,  aut  revelationes  revelationibus;  sed  sic  omnes  docendi  partes  in  filio  suo  complevisse,  ut  hoc  ultimum  aeternumque  ab  eo  nobis  habendum  sit  testimonium.  Qua  ratione  totum  hoc  novi  testamenti  tempus,  ex  quo  cum  evangelii  sui  praedicatione  nobis  apparuit  Christus  ad  diem  usque  iudicii,  per  horam  novissimam,  novissima  tempora,  novissimos  dies,  ut  alibi  obiter  indicavimus,  designatur.  Quo,  perfectione  doctrinae  Christi  contenti,  discamus  nullam  ultra  novam  aut  nobis  fingere,  aut  ab  aliis  confictam  admittere  (Matth.  17).  Itaque  non  temere  pater  filium  ad  nos [p. 426]  mittens,  singulari  praerogativa  doctorem  nobis  praefecit:  ipsum,  non  hominum  quenquam,  audiri  praecipiens.  Paucis  quidem  verbis  nobis  eius  magisterium  commendavit,  cum