9:206  hic  sorices  perire.1)  Rupem  enim  Paulus  vocat  non  saxi  duritiem,  sed  profluentem  inde  potum.  Alioqui  non  quadrarent  inter  se  membra.  Deinde  nisi  ad  externum  et  visibile  symbolum  hoc  refertur,  mutila  erit  Pauli  [pag.  191]  ratiocinatio:  quandoquidem  eos  designat  qui  spirituale  sacramentum  non  spiritualiter  manducarunt.  Perspicua  illis  loquutio  est:  Spiritualis  petra  erat  Christus.  Atqui  non  patitur  Pauli  disputatio,  petram  alio  transferri,  quam  ad  potum  illum  quem  mystico  nostro  calici  comparat.  Sequitur  tandem  in  clausula:  Pleraeque  loquutiones  veteris  testamenti  dissonant  a  verbis  coenae  Domini.  Quasi  Paulus  de  Christi  coena  paulo  ante  loquutus,  eius  memoriam  dissono  sermone  ex  piorum  cordibus  abolere  voluerit.  Duodecimum  argumentum  est,  non  esse  pertinaciter  retinendam  literam  in  verbis  coenae,  quando  in  aliis  plerisque  scripturae  locis,  si  τό  ῥητὸν  praecise  urgetur,  magna  sequetur  absurditas.  Exempla  deinde  quasi  ex  sinu  nostro  prolata  recitant:  Verbum  caro  factum  est,  Pater  maior  me  est,  Qui  videt  me  videt  et  patrem.  Duo  posteriora  unde  sumpserint,  nescio:  [pag.  192]  quia  tamen  ad  praesentem  causam  minime  sunt  apposita,  malim  ex  innumera  multitudine  magis  idonea  deligere.  Certe  scriptura  si  tam  violenter  prematur,  ut  isti  volunt,  tot  fere  absurditatibus  scatebit,  quot  versus  occupat.  Deus  erit  vir  belli,  poenitentia  ducetur,  descendet  e  coelo  ut  cognoscat  facta  hominum,  ultionem  appetet,  nunc  iracundiae  impetu  feretur,  nunc  placatus  ridebit,  nunc  dormiet,  nunc  surget  quasi  expergefactus  a  crapula,  nunc  oculos  avertet,  nunc  recordabitur.  In  his  sententiis  respondeant  Magdeburgenses,  an  ad  tuendas  omnes  syllabas  satis  sint  industrii.  Quanquam  hic  flexuosis  ambagibus  locus  non  est.  Scripsi  enim  quod  verissimum  esse  omnes  perspiciunt,  dum  reiecta  omni  interpretatione  huic  verbo  incumbunt:  Hoc  est  corpus  meum,  non  absimilem  causam  suscipere,  quam  olim  Anthropomorphitis  fuit,  dum  ex  auribus,  oculis,  pedibus  Deum  probabant  esse  corporeum,  [pag.  193]  Quid  enim  tot  scripturae  testimoniis  apertius,  quae  Deo  nares,  oculos,  pedes  et  manus  tribuunt?  Gratus  fuit  Deo  odor  suffitus  in  sacrificio  Noe:  quomodo  odorari  potuit,  nisi  naribus  praeditus?  Eosdem  triumphos  quum  crepent  Magdeburgenses,  a  nobis  commonefacti  parum  ingenue  dissimulant.  Subiiciunt  postea,  quaedam  non  secundum  τὸ  ῥητὸν  sed  secundum  διάνοιαν  accipienda  esse:  sed  hoc  loco  censeri  nolunt  verba  coenae,  quia  ex  ipsis  probandum  esset,  aliter  quam  sonant  debere  intelligi.  Nobis  vero  tam  ex  communi  sacramentorum  natura,  quam  ex  ipsa  coenae  institutione  1)  Ie  respon  qu'ils  se  descouvrant  icy  eux  mesmes  le  derriere.