50:206  citatum.  Ergo  a  causa  iustificationis  excluditur  omne  operum  meritum,  quum  tota  assignatur  fidei.  Fides  enim,  quatenus  Dei  gratuitam  bonitatem,  Christum  cum  omnibus  suis  bonis,  testimonium  adoptionis  nostrae,  quod  in  evangelio  redditur,  in  se  continet:  in  universum  legi,  meritis  operum  et  hominum  dignitati  opponitur.  Nam  quod  caeremoniis  tantum  opponi  putant  sophistae,  nullo  negotio  contextus  disputationis  mox  coarguet.  Meminerimus  ergo,  qui  fide  iusti  sunt,  eos  extra  se  iustos  esse,  nempe  in  Christo.  Unde  etiam  inepta  quorundam  cavillatio  refellitur,  qui  Paulum  eludunt:  quia  Moses  iustitiam  appellet  probitatem  :  atque  adeo  nihil  aliud  significet,  quam  Abraham  fuisse  habitum  probum  virum,  quia  Deo  crediderit.  Tales  vertiginosos  spiritus  hodie  suscitat  Satan,  qui  obliquis  calumniis  tanquam  cuniculis  scripturae  certitudinem  subruant.  At  vero  Paulus,  qui  sciebat  Mosem  non  docuisse  illic  pueros  grammaticam,  sed  de  iudicio  Dei  loquutum  esse,  non  immerito  nomen  i  u  s  t  i  t  i  a  e  theologice  accepit.  Neque  enim  ea  ratione,  qua  probitatis  laudem  habemus  apud  homines,  coram  Deo  iusti  censemur:  sed  quum  afferimus  perfectam  legis  obedientiam.  Nam  iustitia  transgressioni  legis  etiam  in  minimo  apice  opponitur.  Eam  quia  non  habemus  a  nobis,  Deus  nobis  gratuito  donat.  Verum  hic  Iudaei  Paulum  exagitant,  quod  perperam  Mosis  verba  in  suum  commodum  detorserit.  Neque  enim  illic  de  Christo  tractat  Moses,  aut  de  vita  aeterna:  sed  terrenae  modo  promissionis  meminit.  A  Iudaeis  quoque  non  procul  absunt  papistae:  nam  etsi  Paulum  non  audent  insectari,  tamen  eius  intentionem  prorsus  evertunt.  Respondeo,  Paulum  hic  pro  confesso  sumere  quod  indubium  axioma  est  apud  Christianos,  quascunque  promissiones  Abrahae  dedit  Dominus,  primae  illius  fuisse  appendices:  Ego  sum  Deus  tuus,  merces  tua  magna  nimis,  et  in  semine  tuo  benedicentur  omnes  gentes.  Itaque  quum  audiret  Abraham  :  Erit  semen  tuum  sicut  arena  maris,  ete.  in  hoc  verbo  non  substitit,  sed  ipsum  potius  includebat  in  gratia  adoptionis,  tanquam  partem  in  toto.  Quin  etiam,  quaecunque  promissio  data  esset,  illam  non  aliter  recipiebat  quam  testimonium  paternae  Dei  gratiae,  ut  inde  salutis  fiduciam  apprehenderet.  Nam  et  in  hoc  ab  infidelibus  differunt  filii  Dei,  quod  illi  quidem  Dei  beneficiis  communiter  cum  iis  fruuntur,  sed  tamen  instar  pecudum  ea  ingurgitant,  neque  altius  respiciunt:  hi  vero,  quia  promissionibus  sanctificata  esse  beneficia  omnia  norunt,  Deum  in  illis  agnoscunt  patrem.  Ita  fit  ut  semper  dirigantur  ad  spem  vitae  aeternae  :  quia  a  fundamento  incipiunt,  hoc  est  a  fide  suae  adoptionis.  Non  ergo  iustificatus  est  Abraham,  quia  tantum  de  multiplicatione  seminis  Deo  crediderit:  sed  quia  Dei  gratiam  amplexus  est,  fretus  mediatore  promisso,  in  quo  omnes  Dei  promissiones  sunt  Etiam