30:206  rum  effugia  moremur  qui  alieno  plerumque  exemplo  se  tueri  volunt:  Non  videmus,  inquiunt,  alios  de  istis  commoveri,  et  si  nos  ultro  istud  aggrediamur,  veniemus  in  aliorum  contemptum,  et  ipsi  nos  irridebunt.  Et  istis  effugiis  occasionem  quaerimus  segnitiem  nostram  et  ignaviam  occultandi.  Nos  itaque  contra,  ut  ante  dixi,  si  deficere  alios  viderimus,  audentiore8  simus,  Deumque  vocantem  nos  cognoscamus,  et  auxilium  promittentem,  quasique  manu  ducentem  sequamur.  Neque  miremur  si  alii  fugiant,  quemadmodum  ne  mirari  quidem  debemus,  si  isti  de  quibus  hic  agitur,  sese  mutuo  quidem  hortantur,  sed  interim  singuli  pedem  referunt,  et  pro  viribus  periculum  fugiunt,  et  quum  res  postulat,  officio  desunt.  Nae  oportebat  ipsos  suam  ignaviam  et  inertiam  accusare,  sed  alii  alios  increpant,  quisque  miratur  nullum  moveri  promissis  regiis,  sed  nemo  tamen  rem  aggreditur.  Sane  sic  videas  hodie  multos,  qui,  tot  malis  et  vitiis  ac  corruptelis  inter  nos  regnantibus,  commoventur  magnopere,  et  diligenter  in  aliorum  vitia  inquirunt,  et  cernunt  acutum:  et  modo  hunc,  modo  illum  carpunt,  gravique  sententia  feriunt,  denique  a  maximo  ad  minimum  omnes  communi  consensu  in  vitia  et  corruptelas  invehuntur:  et  dum  in  alios  sententiam  ferunt,  se  suo  suffragio,  licet  incauti,  condemnant.  Ergo  inquiunt,  quanta  passim  morum  corruptio,  quanta  ubique  confusio  regnat?  Hinc  invehuntur  in  ebriosos,  in  helluones,  in  gurgites,  parasitas,  blaterones,  scortatores,  adulteros,  blasphemos,  fures,  foeneratores,  latrones,  homicidas,  periuros,  obtrectatores,  haereticos,  ignavos  et  inertes,  denique  in  omnia  vitia  severius  invehuntur  et  declamitant:  nemo  non  vult  adversus  istiusmodi  homines  flagitiosos  sententiam  ferre.  Verum  enim  vero  non  satis  est  in  alios  invehi,  nisi  a  te  ipso  facias  initium,  ut  deinde  liberius  alios  reprehendas.  Nam  quinam  plerumque  vitiis  illis  laborare  deprehenduntur,  nisi  qui  sunt  in  aliis  carpendis  audacissimi?  et  qui  quaelibet  flagitia  simulationis  et  hypocriseos  pallio  tegunt?  Quare  si  fratres  aut  proximos  vitio  laborare  aliquo  videamus,  diligenter  illos  corripiendos  fateor,  sed  ita  tamen  ut  a  nobis  initium  faciamus,  et  in  Dei  timore  sic  ambulare  discamus,  ne  in  similia  vitia  incidamus,  et  ne  verbis  quidem  et  ore  vitia  condemnemus,  quae  tamen  in  pectore  foveamus,  et  de  quibus  etiam  convinci  possimus.  Porro  in  sequentibus  Davidis  verbis:  Quis  est  hic  Philistaeus  incircumcisus,  qui  exprobravit  aciem  Dei  viventis?  summa  ipsius  apparet  pietas,  qua  sola  excitatur,  non  autem  ambitione  ut  fere  solent  qui  viri  fortes  et  magnanimi  volunt  haberi,  gloriam  apud  homines  quaerere,  vel  privatas  familiarum  iniurias  ulcisci,  vel  saltem  victoriae  titulo  gloriari:  denique  si  quod  eximium  et  forte  facinus  homines  admittunt,  vanitate  potius  et  superbia  et  arrogantia