1:206  [CO  1.  206]  non  hominibus  ipsis  dari,  sed  ministerio,  cui  praefecti  sunt;  vel,  ut  expeditius  loquamur,  verbo  Dei,  in  cuius  ministerium  vocati  sunt.  Ut  enim  ordine  omnes  persequamur,  tam  prophetas  et  sacerdotes,  quam  apostolos  et  discipulos,  non  reperiemus  ulla  iubendi,  docendi  aut  respondendi  potestate  fuisse  praeditos  nisi  in  nomine  et  verbo  Domini.  Mosen  ipsum,  prophetarum  omnium  primum,  audiri  voluit  Dominus.  Sed  quid  ille  mandavit,  aut  omnino  nunciavit,  nisi  a  Domino?  Neque  enim  aliud  poterat.  Prophetas  suos  olim  constituit  super  gentes  et  regna,  ut  evellerent  et  extirparent,  perderent  et  subverterent,  aedificarent  et  plantarent  (Ier.  1).  Sed  simul  additur:  ideo  quod  iam  in  eorum  ore  verba  sua  dederat.  Neque  enim  ex  ipsis  prophetis  ullus  os  aperuit,  nisi  Domino  verba  praeeunte.  Unde  illa  toties  apud  eos  repetita:  verbum  Domini,  onus  Domini,  os  Domini  locutum  est;  visio  a  Domino,  dicit  Dominus  exercituum.  Et  merito.  Exclamabat  enim  Iesaias:  polluta  sibi  esse  labia  (Ies.  6).  Ieremias  se  nescire  loqui  fatebatur,  quod  puer  esset  (Ier.  1).  Quid  ab  illius  polluto,  aut  huius  fatuo  ore  prodire  poterat,  [OS  235]  nisi  immundum  aut  insulsum,  si  suum  ipsi  sermonem  locuti  essent?  Sancta  vero  et  pura  illis  labia  fuerunt,  cum  spiritus  sancti  coeperunt  esse  organa.  Ac  quae  in [p. 423]  universum  fuerit  prophetarum  functio,  pulchre  apud  Ezechielem  describitur  :  fili  hominis,  speculatorem  dedi  te  domui  Israel;  audies  igitur  ex  ore  meo  verbum  et  nunciabis  illis  ex  me  (Ez.  3).  Qui  audire  iubetur  ex  ore  Domini,  nonne  quidquam  ex  se  comminisci  prohibetur?  Quid  vero  est  nunciare  a  Domino,  nisi  sic  loqui,  ut  confidenter  iactare  possit,  non  suum  esse,  sed  Domini  verbum  quod  attulerit?  Tantundem  est  apud  Ieremiam  aliis  verbis  (Ier.  23):  Propheta  apud  quem  est  somnium,  narret  somnium,  et  qui  habet  verbum  meum,  loquatur  verbum  meum  verum.  Quid  paleis  ad  triticum,  inquit  Dominus.  De  sacerdotibus  quoque  praecepit  Dominus  (Deut.  17.  Mal.  2),  ut  verbum  legis  ex  eorum  ore  requireretur.  Sed  causam  simul  adiecit:  quia  angeli  Domini  exercituum  sunt.  Iam  et  in  apostolos  respiciamus.  Multis  quidem  et  insignibus  elogiis  ornantur,  quod  lux  mundi  sint  et  sal  terrae;  quod  pro  Christo  audiendi;  quod  quaecunque  in  terra  ligaverint,  aut  solverint,  ligata  erunt  ac  soluta  in  coelo  (Matth.  5.  Luc.  10.  Ioan.  20).  Verum  suo  nomine  prae  se  ferunt,  quantum  sibi  in  suo  munere  permissum  sit.  Apostolos  esse  oportet,  qui  non  garriant  quidquid  collibitum  fuerit  sed  mandata  eius,  a  quo  missi  sunt,  bona  fide  perferant.  Ecce,  dicebat  illis  Christus  (Ioan.  20),  quemadmodum  misit  me  vivens  pater,  ita  et  ego  mitto  vos.  Quomodo  autem  a  patre  missus  fuerit,  altera  sua  voce  testatur.  Doctrina, [p. 424]  inquit,  mea  non