50:204  duca  doctrina.  Est  autem  absurdum  ut  praeclaris  initiis  non  respondeant  progressus.  4.  Tanta  passi  estis*  Aliud  argumentum  :  quum  tam  multa  passi  fuerint  evangelii  nomine,  ut  ne  id  totum  nunc  momento  perdant.  Imo  per  modum  exprobrationis  rogat  an  velint  sibi  periisse  tot  praeclara  certamina,  quae  pro  fide  sustinuerant.  Nisi  enim  recta  fides  illis  tradita  fuisset  a  Paulo,  temeritatis  erat  pro  malae  causae  defensione  quidquam  pati.  At  vero  experti  fuerant  Deum  sibi  adesse  in  persequutionibus.  Onerat  igitur  invidia  pseudoapostolos,  qui  Galatas  tam  pretiosis  ornamentis  spoliabant.  Caeterum  temperandae  acerbitatis  causa  additur  correctio,  si  tamen  frustra:  qua  ipsorum  animos  erigit:  ut  meliore  spe  concepta  ad  resipiscentiam  adspirent.  Hic  enim  omnium  castigationum  est  finis,  non  praecipitare  in  desperationem  homines,  sed  in  melius  animare.  5.  Qui  ergo  subministrat  Iam  non  de  gratia  regenerationis,  sed  de  aliis  donis  spiritus  loquitur.  Esse  enim  diversum  argumentum  a  superiore,  ordo  ipse  demonstrat:  quia  aliud  argumentum  interposuit.  Admonet  igitur,  omnes  spiritus  sancti  dotes  quibus  excellebant,  esse  evangelii  fructus,  et  quidem  ore  suo  apud  eos  praedicati.  Ergo  illis  se  spoliabant,  quum  relicto  evangelio,  in  aliud  doctrinae  genus  transvolarent.  Rursus  quanti  aestimabant  dona  illa,  curare  etiam  debebant,  ut  mordicus  retinerent  evangelium,  eiusmodi  donis  adiungit  virtutes,  hoc  est  miracula.  6.  Quemadmodum  Abraham  credidit  Deo,  et  imputatum  est  illi  in  iustitiam.  7.  Cognoscite  ergo  quod  qui  ex  fide  sunt,  ii  sunt  filii  Abrahae.  8.  Scriptura  autem,  quia  praevidebat  quod  ex  fide  iustificet  Deus  gentes,  ante  evangelizavit  Abrahae,  In  te  benedicentur  omnes  gentes.  9.  Itaque  qui  ex  fide  sunt,  benedicuntur  cum  fideli  Abraham.  Postquam  eos  rebus  ipsis  convicit  et  experientia,  nunc  ad  scripturae  testimonia  descendit.  Primo  Abrahae  exemplum  adducit.  Tametsi  autem  non  semper  adeo  firma  sunt  argumenta  ab  exemplis,  hoc  tamen  validissimum  est:  quia  neque  in  re  neque  in  persona  quidquam  est  discriminis.  Nam  neque  plures  sunt  aditus  ad  iustitiam:  et  ideo  pater  omnium  fidelium  Abraham  vocatur,  quia  commune  est  omnium  exemplar.  Imo  in  eius  persona  nobis  praescripta  est  universalis  regula  obtinendae  iustitiae.  6.  Quemadmodum.  Subaudienda  est  adversativa  particula;  quin  potius:  nam  quum  interrogasset,  voluit  subito  praecidere  ansam  dubitationi.  Vel  certe  vox  quemadmodum  ad  proximum  duntaxat  refertur:  nempe  quod  ex  auditu  fidei  haberent  subministrationem  spiritus  et  virtutum.  Ac  si  diceret,  lucere  in  gratia  ipsis  collata  similitudinem  cum  Abraham.