1:204  [CO  1.  204]  aut  argento,  sed  proprio  sanguine  aestimavit,  ut  Paulus  non  dubitet  dicere,  irritam  fieri  eius  mortem,  si  animas  nostras  hominibus  in  subiectionem  tradimus.  Siquidem  non  aliud  agit  aliquot  capitibus  epistolae  ad  Galatas,  quam  Christum  nobis  obscurari  vel  potius  extingui,  nisi  in  sua  libertate  stent  conscientiae  nostrae:  a  qua  certe  exciderunt,  si  possunt  hominum  arbitrio,  legum  ac  constitutionum [p. 418]  vinculis  illaqueari.  Verum,  ut  res  est  cognitu  dignissima,  ita  longiori  magisque  perspicua  explicatione  indiget.  Statim  enim  atque  de  humanarum  constitutionum  abrogatione  verbum  factum  est,  ingentes  turbae  partim  a  seditiosis,  partim  a  calumniatoribus  commoventur,  quasi  universa  simul  tollatur  ac  subvertatur  hominum  obedientia.  Ad  eum  ergo  lapidem  ne  quis  impingat,  animadvertamus,  duplex  esse  in  homine  regimen:  alterum  spirituale,  quo  conscientia  ad  pietatem  et  cultum  Dei  instituitur,  alterum  politicum,  quo  ad  humanitatis  et  civilitatis  officia,  quae  inter  homines  servanda  sunt,  homo  eruditur.  Vulgo  appellari  solent,  iurisdictio  spiritualis  et  temporalis;  non  impropriis  nominibus,  quibus  significatur  priorem  illam  regiminis  speciem  ad  animae  vitam  pertinere,  hanc  autem,  in  his,  quae  praesentis  vitae  sunt  versari;  non  quidem  in  pascendo  aut  vestiendo,  sed  in  praescribendis  legibus,  quibus  homo  inter  homines  vitam  honeste  modesteque  exigat.  Nam  illa  in  animo  interiori  sedem  habet,  haec  autem  externos  mores  duntaxat  componit.  Alterum  vocare  nobis  liceat  regnum  [OS  233]  spirituale,  alterum  regnum  politicum.  Haec  autem  duo,  ut  partiti  sumus,  seorsum  singula  dispicienda,  et  dum  alterum  tractatur,  avocandi  avertendique [p. 419]  ab  alterius  cogitatione  animi.  Sunt  enim  in  homine  veluti  mundi  duo,  quibus  et  varii  reges  et  variae  leges  praeesse  possunt.  Cum  ergo  ad  hoc  spirituale  regnum  pertineat,  quidquid  de  christiana  libertate  a  nobis  dictum  est,  in  hoc  sermone  nullum  adversus  politicum  legum  aut  legislatorum  ordinem  nobis  certamen  est,  sed  contra  potestatem  quam  usurpant  sibi,  qui  pastores  ecclesiae  videri  volunt,  re  autem  vera  saevissimi  sunt  carnifices.  Quas  enim  leges  condunt,  spirituales  esse  aiunt,  ad  animam  pertinentes,  et  eas  ad  vitam  aeternam  necessarias  affirmant.  Sic  autem  regnum  Christi  invaditur,  sic  libertas  ab  ipso  fidelium  conscientiis  data,  opprimitur  penitus  ac  disiicitur.  Taceo  nunc,  quanta  impietate  legum  suarum  observationem  faciant,  dum  ex  ipsa  et  peccatorum  remissionem  et  iustitiam  quaerere  docent,  dum  totam  religionis  et  pietatis  summam  in  ipsa  statuunt.  Hoc  unum  contendo,  necessitatem  imponi  conscientiis  non  debere,  in  quibus  rebus  a  Christo  liberantur,  nec  nisi  liberatae,  ut  antea  docuimus,  quiescere  apud  Deum  possunt.  Unicum  regem  agnoscant,  suum  liberatorem  Christum,  et  una  libertatis  lege,