52:203  203  EPIST.  PAULI  AD  THESSALONICENSES  II  204  miraculis  evangelium  suum  obsignat:  adversarius,  Satanae  efficacia,  nos  a  spiritu  sancto  alienat,  et  suis  praestigiis  confirmat  miseros  homines  in  errore.  Signa  mendacii  appellat,  non  tantum  quae  falso  et  mendaciter  finguntur  ab  astutis  hominibus  ad  ludendos  simplices  (cuiusmodi  fallaciis  scatet  totus  papatus:  sunt  enim  pars  eius  potentiae  quam  prius  attigit),  sed  mendacium  in  eo  statuit,  quod  Satan,  quae  alioqui  vere  sint  Dei  opera,  in  adversum  finem  trahit  et  miraculis  abutitur  ad  obscurandam  Dei  gloriam.  Non  tamen  interea  dubium  est  quin  praestigiis  illudat:  ut  in  magis  Pharaonis  habemus  exemplum.  10.  In  iis  qui  pereunt.  Limitat  Satanae  potentiam,  ne  electis  Dei  noceat:  quemadmodum  et  Christus  eos  ab  hoc  periculo  eximit.  Unde  apparet  non  nisi  eius  permissu  tantum  valere  Antichristum.  Fuit  autem  haec  necessaria  consolatio.  Nam  alioqui  pavore  exanimari  pios  omnes  necesse  foret,  si  viderent  apertum  gurgitem  totam  viam  occupantem,  qua  sibi  transeundum  esset.  Paulus  ergo  utcunque  sollicitos  esse  velit,  quo  sibi  caveant  ne  securitate  nimia  defluant,  imo  se  proiiciant  in  exitium:  iubet  tamen  bene  sperare,  quia  fraenata  est  Satanae  potentia,  ne  alios  quam  reprobos  in  ruinam  dare  possit.  Pro  eo  quod  dilectionem.  Ne  conquerantur  reprobi  se  innoxios  perire,  et  Dei  saevitia  potius  quam  proprio  delicto  esse  morti  devotos:  ostendit  Paulus  quam  iustis  de  causis  adeo  severa  Dei  vindicta  in  illos  ventura  sit:  quia  scilicet  veritatem  sibi  oblatam  quo  decet  affectu  non  fuerint  amplexi,  imo  sponte  salutem  recusaverint.  Atque  hinc  clarius  apparet  quod  iam  dixi,  oportuisse  mundo  praedicari  evangelium,  antequam  Deus  Satanae  tantum  permitteret:  quia  non  nisi  extrema  hominum  ingratitudine  provocatus,  tam  foedam  templi  sui  profanationem  unquam  passurus  esset.  In  summa,  testatur  Paulus  Antichristum  iustae  Dei  vindictae  ministrum  fore  adversus  eos  qui  ad  salutem  vocati  evangelium  respuerint,  ac  potius  adiecerint  animum  ad  impietatem  et  errores.  Quare  non  est  quod  nunc  obiiciant  papistae,  indignum  fuisse  Christi  clementia  ecclesiam  suam  sic  abiicere.  Nam  quamvis  immanis  fuerit  Antichristi  dominatio,  non  tamen  perierunt  nisi  qui  digni  erant:  imo  qui  sponte  mortem  oppetierunt.  Et  certe  quum  vox  filii  Dei  ubique  personuisset,  surdas,  imo  obstinatas  reperit  hominum  aures:  et  quamquam  vulgaris  fuit  christianismi  professio,  pauci  tamen  vere  et  ex  animo  se  Christo  addixerunt.  Nihil  itaque  mirum  si  tam  sceleratum  contemptum  mox  subsequuta  est  similis  ultio.  Quaeritur  annon  in  alios  cadat  excaecationis  poena,  nisi  qui  data  opera  evangelio  fuerunt  rebelles.  Respondeo,  peculiare  hoc  iudicium  quo,  apertam  contumaciam  ultus  est  Deus,  non  obstare  quin  stupore  percutiat,  quoties