50:202  Dei  cum  suis  bonis  omnibus,  mortem  eius  duci  pro  nihilo:  quis  pius  animus  indignatione  non  rumpatur?  avoiijTouc  ergo,  hoc  est  mente  alienatos  pronuntiat,  qui  passi  fuerint  tanto  sacrilegio  se  implicari.  Neque  tantum  quod  se  decipi  passi  fuerint,  eos  arguit,  sed  quadam  veluti  magica  incantatione  deludi:  quod  longe  gravius  est.  Innuit  enim  eorum  lapsum  dementiae  magis  esse  quam  stultitiae.  Quidam  ad  ingenium  gentis  Paulum  respexisse  putant,  quod  e  barbaris  oriundi,  durius  tractandi  essent:  verum  malo  simpliciter  ad  rem  ipsam  referre.  Est  enim  prodigii  simile,  in  tanta  claritate  evangelii  adhuc  diaboli  praestigiis  patere  locum.  Nam  non  ideo  solum  fascinatos  esse  dicit  et  mente  alienatos,  quia  non  obediant  veritati  :  sed  quia  tam  certo,  tam  aperte,  tam  familiariter,  tam  efficaciter  denique  edocti  mox  deficiant.  Erasmus  credendi  verbum  maluit:  quod  etsi  penitus  non  reiicio,  contextui  tamen  aptius  est  quod  reddidi  :  quia  non  accusat  eos  Paulus  quod  initio  evangelium  repudiaverint,  sed  quia  non  perstiterint  in  obedientia,  obiurgat.  Quibus  ante  oculos.  Pertinet  hoc  (quemadmodum  iam  attigi)  ad  culpam  exaggerandam:  nam  quo  notior  nobis  fuit  Christus,  eo  gravius  crimen  est  defectionis.  Dicit  igitur  tantam  fuisse  doctrinae  suae  perspicuitatem,  ut  non  tam  fuerit  nuda  doctrina,  quam  viva  et  expressa  imago  Christi.  Eam  igitur  habuerant  notitiam,  quae  adspectui  conferri  posset.  Dura  est  Augustini  expositio  et  a  mente  Pauli  remota,  qui  praescriptum  dicit  Christum,  quasi  a  possessione  depulsus  foret.  Alii  legunt  proscriptus:  quae  vox  non  male  conveniret,  si  proscribi  accipias  pro  palam  publicari.  Unde  et  7ipOYpa|Jt[xaTa  vocant  Graeci  tabulas  quibus  possessiones  venales  publicantur,  ut  sit  res  exposita  omnium  oculis.  Sed  in  participio  depictus  minus  est  ambiguitatis:  et  meo  iudicio  optime  quadrat.  Nam  ut  ostendat  Paulus  quanta  suae  praedicationis  energia  fuerit,  primum  picturae  ipsam  comparat,  quae  imaginem  Christi  ad  vivum  illis  expresserit:  deinde  hac  similitudine  non  contentus,  subiungit  Christum  fuisse  inter  eos  crucifixum.  Quo  significat,  non  debuisse  plus  affici  praesenti  mortis  Christi  adspectu,  quam  sua  praedicatione.  Nam  quod  aliqui  intelligunt,  Galatas  crucifixisse  rursus  Dominum  et  ludibrio  habuisse,  quum  ab  evangelii  puritate  recesserant:  vel  certe  praebuisse  aurem  et  fidem  accommodasse  impostoribus,  qui  eum  crucifigebant  :  mihi  videtur  coactius.  Retineamus  ergo  sensum  illum,  non  aliter  Pauli  doctrina  edoctos  fuisse  de  Christo,  ac  si  fuisset  illis  ostensus  in  tabula,  imo  inter  ipsos  crucifixus.  Talis  repraesentatio,  nulla  eloquentia,  nullis  rhetorum  coloribus  fieri  potest,  nisi  adsit  illa  spiritus  efficacia,  de  qua  dictum  fuit  in  utraque  ad  Corinthios.  Itaque  qui  rite  evangelii  ministerio  defungi  volent,  discant  non  tantum  loqui  et  declamitare:  sed  etiam  pene-