27:202  tent  a  cheminer  en  l'obeissance  de  Dieu,  que  la  religion  soit  conservee  en  sa  purete:  cela  n'est  point  pour  le  profit  special  des  Levites,  mais  c'est  pour  le  salut  general  de  toute  l'Eglise  de  Dieu.  Or  la  dessus  Moyse  derechef  dit  ce  que  nous  avons  expose:  c'est  assavoir  que  les  Iuifs  pouvoyent  manger  chair  par  tout  le  pays  de  Iudee,  moyennant  que  les  sacrifices  fussent  reservee  pour  le  sanctuaire,  et  pour  le  temple,  quand  il  seroit  basti  en  son  temps.  Or  nous  avons  desia  monstre  pourquoy  Dieu  donne  un  tel  conge:  c'est  afin  que  les  hommes  apprennent  de  ne  rien  attenter  qu'ils  n'ayent  pleine  certitude,  et  qu'ils  ne  facent  rien  qui  ne  leur  soit  licite.  Et  comment  cognoistrons-nous  que  ce  que  nous  faisons  est  agreable  a  Dieu?  Quand  nous  aurons  sa  parolle  qu'il  nous  donne.  Car  ce  n'est  point  a  nous  de  savoir  son  conseil,  sinon  entant  qu'il  nous  le  revele:  brief,  il  nous  est  ici  monstre  qu'en  toute  nostre  vie  nous  ne  devons  pas  remuer  un  doigt,  que  nous  ne  soyons  resolus  que  cela  nous  est  permis  de  Dieu.  Or  il  ne  nous  laisse  point  en  doute  de  son  coste,  il  nous  a  baille  une  reigle  certaine  et  infallible,  tellement  que  la  discretion  nous  sera  tousiours  certaine:  voire  moyennant  que  nous  vueillions  nous  contenter  de  ce  que  Dieu  approuve,  et  que  nous  n'adioustions  rien  a  sa  doctrine,  ni  a  sa  Loy.  Et  la  Dieu  nous  a  tellement  declaire  sa  volonte,  que  si  nous  demandons  maintenant  de  ceci  ou  de  cela,  c'est  par  faute  que  nous  ne  voulons  point  escouter  celuy  qui  a  toute  maistrise  par  dessus  nous:  comme  tous  les  scrupules  qui  se  feront  par  les  Papistes,  ne  procedent  sinon  d'une  folle  curiosite  qu'ils  ont  de  mieux  faire  que  Dieu  ne  commande  :  o  voila,  ie  voudroye  estre  si  devot,  que  rien  ne  m'eschappast  qui  ne  fust  bon.  Et  n'est-ce  point  assez  d'obeir  a  Dieu  ?  O  voire,  mais  ie  voudroye  davantage.  Or  celuy  qui  passe  telles  bornes,  il  faudra  qu'il  se  tourmente,  et  qu'il  soit  en  inquietude  tout  le  temps  de  sa  vie:  comme  nous  voyons  que  ces  bigots  seront  tousiours  agitez  de  quelque  doute.  Et  qui  en  est  cause?  C'est  un  salaire  qu'ils  meritent  tresbien,  pource  qu'ils  ne  se  veulent  point  gouverner  selon  la  parolle  de  Dieu  :  mais,  comme  dit  le  Prophete  Isaie,  quand  nous  cheminerons  purement  en  la  simplicite  de  la  parolle  de  Dieu,  nous  aurons  repos  en  nos  ames,  nous  serons  affranchis  de  tous  troubles,  et  de  ces  disputes  que  font  les  povres  infideles:  car  ils  ne  savent  par  quel  bout  commencer,  ils  ne  savent  aussi  ou  ils  doivent  finir.  Ainsi  notons  bien  que  ce  n'est  point  sans  cause,  que  Dieu  parlant  du  boire  et  du  manger,  donne  ici  un  conge  expres  a  son  peuple:  voire  afin  que  nous  n'attentions  rien  qu'en  son  nom,  et  que  nous  cognoissions  qu'il  a  un  tel  soin  de  nous,  qu'il  veut  guider  tous  nos  pas,  et  qu'il  nous  faut  cheminer  comme  devant  sa  face.  Au  reste,  apprenons  de  recevoir  la  liberte