10.1:202  Touchant  ce  qu'allegue  frere  Matthieu  des  Cherubins  c'est  merveilles  qu'il  n'apercoit  point  quil  y  a  manifeste  contradiction  en  ses  propoz.  Mais  voila  comme  Dieu  abrutit  ses  ennemys.  Il  confesse  que  les  idoles  ont  este  deffendus  aux  Iuifz.  Or  en  despit  de  ses  dens  il  faut  quil  confesse  touchant  les  Cherubins  qu'ilz  n'ont  este,  que  pour  le  temps  de  la  Loy.  Il  s'ensuit  donques  qu'ilz  n'ont  pas  este  faictz  pour  figure  de  Dieu,  comme  aussi  la  chose  le  monstre.  Car  estans  posez  au  sanctuaire  pour  couvrir  le  Propiciatoire  ilz  signifioient  que  la  maieste  de  Dieu  est  invisible.  Et  en  cachant  leurs  visages  aveques  leurs  ailes  ilz  avertissoient  les  hommes  de  la  reverence  et  sobriete  quilz  doivent  avoir  en  cherchant  Dieu.  A  quoy  il  n'y  a  rien  plus  contraire  que  d'attenter  de  luy  faire  quelque  remembrance  corporelle.  La  raison  qu'il  allegue  que  les  images  ont  este  deffendues  aux  Iuifz  pour  ce  quilz  estoient  enclins  a  idolatrie  fait  contre  luy  mesme.  Car  ca  este  un  vice  general  a  tous  peuples  et  qui  est  enracine  aux  coeurs  des  hommes.  Car  la  source  d'idolatrie  est  que  nous  sommes  charnelz  et  apprehendons  Dieu  selon  nostre  fantasie.  Parquoy  ie  conclu  au  contraire:  Puis  que  la  raison  sur  laquelle  est  fondee  la  deffense  de  faire  images  dure  encores  auiourdhuy,  que  la  mesme  deffence  nous  apartient  et  doit  estre  appliquee  a  tous  aages  iusques  a  la  fin  du  monde.  Car  iusques  a  ce  que  les  hommes  soient  plainement  renouvellez  il  est  impossible  qu'ilz  ne  s'adonnent  a  idolatrie,  quant  ilz  en  auront  quelque  obiect.  Et  defaict  voila  comme  Lactance,  sainct  Augustin  et  aultres  docteurs  anciens  en  ont  parle.  Cependant  frere  Matthieu  Oris  est  par  trop  effronte  en  disant  que  par  tout  le  nouveau  Testament  on  ne  trouvera  point  passage  qui  condamne  les  idoles.  Car  sainct  Iehan  en  son  Epistre  canonique  non  seulement  retire  les  Chrestiens  de  l'Idolatrie:  mais  leur  commande  de  se  garder  des  idoles.  Qui  plus  est,  encores  qu'il  eust  este  licite  soubz  la  Loy  d'avoir  quelques  signes  ou  remembrances  pour  la  rudesse  du  peuple,  auiourdhuy  cela  ne  devroit  avoir  lieu,  suyvant  la  sentence  de  Iesus  Christ:  L'heure  est  venue,  que  les  vrays  serviteurs  de  Dieu  l'adoreront  en  Esprit  et  en  verite.  Car  qui  notera  bien  toute  la  circonstance  du  lieu,  il  y  a  la  une  deffence  plus  estroitte  d'avoir  images  exterieures  que  iamais  elle  n'a  este  faicte  aux  Iuifz.  Et  quant  sainct  Paul  condamne  les  hommes  d'avoir  converty  la  verite  de  Dieu  en  mensonge,  quant  ilz  y  ont  converty  sa  gloire  en  similitude  d'homme  corruptible  et  en  images  d'oiseaux  ou  de  bestes,  il  ne  parle  point  seullement  pour  un  temps,  mais  donne  une  regle  universelle:  Qu'on  faict  iniure  a  Dieu  en  le  voulant  ainsi  representer.