1:202  [CO  1.  202]  illud  magis,  ne  offendiculum  ponatur  fratri,  aut  lapsus  occasio.  Et  multa  in  eum  sensum,  quae  ex  eo  loco  peti  satius  est,  quam  hic  referri.  Summa  est:  ut  nos,  qui  potentes  sumus,  infirmitates  impotentium  sufferamus,  nec  placeamus  nobis  ipsis.  Sed  unusquisque  nostrum  proximo  placeat  in  bonum,  ad  aedificationem.  Alibi  (1  Cor.  8.  10):  sed  videte,  ne  quo  modo  facultas  vestra  offendiculo  sit  iis  qui  infirmi  sunt  ;  item  :  omnia  quae  in  macello  venduntur  edite,  nihil  interrogantes  propter  conscientiam;  porro  conscientiam  vestram  dico,  non  alterius.  Denique  tales  estote,  ut  nullum  praebeatis  offendiculum,  neque [p. 414]  Iudaeis  neque  Graecis,  neque  ecclesiae  Dei.  Alio  etiam  loco  :  in  libertatem  vocati  estis  fratres,  tantum  ne  libertatem  vestram  detis  in  occasionem  carni,  sed  per  caritatem  servite  vobis  invicem  (Gal.  5).  Ita  est  sane.  Libertas  nostra  non  adversus  imbecilles  proximos  data  est,  quorum  nos  per  omnia  servos  caritas  statuit;  sed  magis  ut  pacem  cum  Deo  in  animis  nostris  habentes,  pacifice  etiam  inter  homines  vivamus.  Pharisaeorum  autem  offensio  quanti  sit  facienda,  discimus  ex  verbis  Domini,  quibus  iubet  omitti  illos,  quia  caeci  sunt,  duces  caecorum  (Matth.  15).  Admonuerant  discipuli,  eos  sermone  ipsius  offensos  fuisse.  Respondet:  negligendos,  nec  curandam  esse  eorum  offensionem.  Res  tamen  adhuc  incerta  pendet,  nisi  teneamus,  qui  nobis  sint  habendi  infirmi  et  qui  Pharisaei;  quo  discrimine  sublato,  non  video  quis  prorsus  restet  inter  offensiones  libertatis  usus,  qui  nunquam  sine  summo  periculo  foret.  Verum  mihi  clarissime  definiisse  videtur  Paulus,  tum  doctrina  tum  exemplis,  quatenus  vel  moderanda  sit  libertas  nostra,  vel  offendiculis  redimenda.  Timotheum  cum  in  consortium  suum  assumeret,  circumcidit;  Titum,  ut  circumcideret,  adduci  non  potuit  (Act.  16.  Gal.  2).  Diversa  facta,  nulla  consilii  nec  animi  mutatio:  nempe,  in  circumcidendo  Timotheo,  cum  liber  esset  ab  omnibus,  omnibus  semet  ipsum  servum  fecit,  et  factus  est  Iudaeis [p. 415]  quasi  Iudaeus  ut  Iudaeos  [OS  231]  lucrifaceret,  iis  qui  sub  lege  erant,  quasi  esset  sub  lege,  ut  eos  qui  sub  lege  erant  lucrifaceret,  iis  qui  sine  lege  erant,  quasi  esset  sine  lege,  ut  eos  lucrifaceret  qui  erant  sine  lege;  infirmis,  quasi  infirmus,  ut  infirmos  lucrifaceret,  omnibus  omnia,  ut  multos  servaret;  quemadmodum  alibi  scribit  (1  Cor.  9).  Habemus  iustam  libertatis  moderationem,  si  cum  fructu  aliquo  indifferenter  contineri  possit.  Quid  respexerit  cum  Titum  circumcidere  fortiter  abnuit,  ipse  testatur  sic  scribens:  sed  neque  Titus,  qui  mecum  erat,  cum  esset  Graecus,  compulsus  fuit  circumcidi,  propter  obiter  ingressos  falsos  fratres,  qui  subintroierant  ad  explorandum  libertatem  nostram,  quam  habemus  in  Christo  Iesu,  quo  nos  in  servitutem  adigerent;  quibus  ne  ad  tempus  quidem  ces-