1:201  [CO  1.  201]  Errant  et  in  eo  plerique  quod  perinde  ac  si  sua  libertas  incolumis  ac  salva  non  esset,  nisi  testes  haberet  homines,  promiscue  et  imprudenter  ea  utuntur.  Qua  importuna  usurpatione  infirmos  fratres  saepenumero  offendunt.  Videas  hodie  quosdam,  quibus  sua  libertas  non  videtur  consistere,  nisi  per  esum  carnium  die  veneris  in  eius  possessionem  venerint.  Quod  edunt,  non  reprehendo;  sed  exigenda  est  ex  animis  falsa  istaec  opinio.  Siquidem  cogitare  debebant,  nihil  se  sua  libertate  novum  consequi  in  hominum  conspectu,  sed  apud  Deum,  et  tam  in  abstinendo  constitutam  esse  quam  in  utendo.  Si  coram  Deo  nihil  referre  intelligunt,  vescanturne  carnibus  an  ovis,  rubrisve,  an  nigris  vestibus  induantur,  satis  superque  est.  Iam  soluta  est  conscientia,  cui  eius  libertatis  beneficium  debebatur.  Ergo  etiamsi [p. 412]  posthac  carnibus  tota  vita  abstineant  et  colorem  unum  perpetuo  ferant,  non  minus  liberi  sunt.  Imo  ideo  liberi  sunt,  quia  libera  conscientia  abstinent.  Perniciosissime  vero  labuntur,  quod  fratrum  infirmitatem  nullius  pensi  habent,  quam  sic  sustineri  a  nobis  decet,  ne  quid  temere  admittamus  cum  eius  offendiculo.  Verum  interdum  quoque  interest  coram  hominibus  asseri  nostram  libertatem.  Et  hoc  fateor;  modus  tamen  summa  cautione  tenendus  est,  ne  infirmorum  curam,  quos  nobis  tantopere  Dominus  commendavit,  abiiciamus.  Dicam  hic  itaque  de  scandalis  nonnihil,  quo  in  discrimine  habenda  sint,  quae  cavenda,  quae  item  negligenda,  unde  postea  statuere  liceat,  quis  sit  inter  homines  libertati  nostrae  locus.  Placet  autem  vulgaris  illa  partitio,  quae  scandalum  aliud  datum,  aliud  acceptum  tradit,  quando  et  apertum  scripturae  testimonium  habet,  nec  inepte  exprimit  quod  significat.  Si  quid  importuna  aut  levitate,  aut  lascivia,  aut  temeritate,  non  ordine  nec  suo  loco  facias,  quo  imperiti  imbecillesque  offendantur:  scandalum  abs  te  datum  dicetur,  quoniam  tua  culpa  factum  fuerit,  ut  eiusmodi  offensio  suscitaretur.  Ac  omnino  scandalum  in  re  aliqua  datum  dicitur,  cuius  culpa  ab  autore  rei  ipsius  profecta  est.  Scandalum  acceptum  vocatur,  cum  res  alioqui  non  improbe  nec  importune [p. 413]  admissa,  malevolentia,  aut  sinistra  quadam  animi  malignitate,  in  offensionis  occasionem  rapitur.  Non  enim  hic  datum  [OS  230]  erat  scandalum,  sed  sinistri  illi  interpretes  sine  causa  accipiunt.  Priore  illo  scandali  genere,  non  nisi  infirmi  offenduntur,  hoc  autem  secundo  acerba  ingenia  et  pharisaica  supercilia.  Quare  alterum  vocabimus  scandalum  infirmorum,  alterum  pharisaeorum;  ac  sic  libertatis  nostrae  usum  temperabimus,  ut  fratrum  infirmorum  ignorantiae  cedere  debeat,  Pharisaeorum  austeritati  nequaquam.  Quid  enim  infirmitati  dandum  sit,  abunde  multis  locis  ostendit  Paulus  (Rom.  14).  Infirmos,  inquit,  in  fide  suscipite.  Item:  ne  posthac  alius  alium  iudicemus.  Verum