52:200  digna  tali  ultione  erat  hominum  ingratitudo.  Hic  videre  est  quam  obliviosi  sint  homines,  ubi  de  aeterna  eorum  salute  agitur.  Observanda  etiam  Pauli  mansuetudo,  qui,  quum  acrius  excandescere  posset,  tantum  leniter  eos  castigat:  est  enim  haec  paterna  exprobratio,  quod  oblivio  rei  tam  seriae  et  utilis  obrepserit.  6.  Et  nunc  quid  detineat.  To  xaxexov  proprio  impedimentum,  vel  causam  morae  hoc  loco  significat.  Chrysostomus,  qui  putat  posse  non  nisi  de  spiritu,  vel  romano  imperio  intelligi,  mavult  in  hanc  alteram  partem  inclinare.  Rationem  habet  probabilem  ,  quia  de  spiritu  aenigmatice  non  loquutus  esset  Paulus,  sed  de  imperio  loquens  odium  fugere  voluerit.  Cur  autem  romani  imperii  status  moretur  Antichristi  revelationem,  causam  assignat:  quia  sicuti  a  Persis  et  Medis  eversa  fuit  Babylonis  monarchia,  Macedones  rursum,  victis  Persis,  monarchiam  occuparunt,  et  tandem  a  Romanis  subacti  fuerunt  Macedones:  ita  Antichristus  vacantem  Romani  imperii  principatum  ad  se  rapturus  sit.  Nihil  horum  est  quod  non  re  ipsa  comprobatum  postea  fuerit:  vere  ergo  loquitur  Chrysostomus,  quod  ad  historiam  spectat.  Sed  ego  aliam  fuisse  Pauli  mentem  arbitror:  nempe  quod  evangelii  doctrinam  huc  et  illuc  propagari  oportuerit,  donec  totus  fere  orbis  reus  contumaciae  et  destinatae  malitiae  peractus  foret.  Neque  enim  dubium  quin  hoc  impedimentum,  qualecunque  esset,  ex  ore  Pauli  Thessalonicenses  audissent:  nam  illis  reducit  io  memoriam  quae  prius  coram  docuerat.  Nunc  expendant  lectores  utrum  sit  probabilius,  Paulum  concionatum  esse,  prius  circumferendam  per  omnes  terrae  partes  evangelii  lucem,  antequam  Deus  ita  Satanae  fraena  laxaret,  an  Romani  imperii  potentiam  obstare  quominus  surgeret  Antichristus,  quia  non  posset  nisi  in  vacuam  possessionem  irrumpere.  Ego  certe  Paulum  audire  mihi  videor,  verba  facientem  de  universali  gentium  vocatione,  quod  omnibus  offerenda  esset  Dei  gratia,  quod  orbem  Christus  perlustraturus  esset  suo  evangelio:  quo  magis  testata  esset  ac  coniuncta  hominum  impietas.  Haec  igitur  dilatio  erat,  donec  completus  esset  evangelii  cursus  :  quia  gratuita  ad  salutem  invitatio  ordine  prior  erat.  Ideo  addit,  suo  tempore:  quia  matura  erat  ultio  post  repudiatam  gratiam.  7.  Mysterium  iniquitatis.  Hoc  revelationi  opponitur:  quia  enim  nondum  tantas  vires  collegerat  Satan,  ut  palam  Antichristus  ecclesiam  opprimeret,  dicit  eum  furtim  et  clanculum  moliri  quod  aperte  suo  tempore  facturus  erat.  Iaciebat  igitur  tunc  in  occulto  fundamenta,  quibus  postea  aedificium  superstrueret,  ut  factum  est.  Atque  hinc  plenius  confirmatur  quod  iam  dixi,  non  unum  notari  hominem  sub  Antichristi  nomine,  sed  regnum  unum  quod  se  in  multas  aetates  extendit.  Eodem  sensu  dicit