50:200  Christi  vitam  in  nos  transfundat  ?  Ergo  hypostasin,  qua  nititur  fides,  declarat  Christi  dilectionem  et  mortem:  nam  inde  aestimandus  est  fidei  effectus.  Qui  fit  ergo  ut  vivamus  Christi  fide?  quia  nos  dilexit  et  se  ipsum  tradidit  pro  nobis.  Amor,  inquam,  quo  nos  complexus  est  Christus,  fecit  ut  se  nobis  coadunaret.  Id  implevit  morte  sua  :  nam  se  ipsum  tradendo  pro  nobis,  non  secus  atque  in  persona  nostra  passus  est.  Proinde  quidquid  in  Christo  fides  reperit,  eius  nos  facit  compotes.  Quum  autem  dilectionis  meminit,  hoc  ipsum  significat  quod  docet  Iohannes  (1.  Iohan.  4,  19):  Non  quia  priores  dilexerimus  eum,  sed  ipse  dilectione  sua  nos  praevenit.  Nam  si  quibus  meritis  provocatus  nos  redemisset:  causa  haec  diceretur.  Nunc  autem  totum  adscribit  Paulus  dilectioni:  est  igitur  gratuita.  Notandus  enim  est  ordo:  dilexit  nos  et  tradidit  se  pro  nobis.  Perinde  enim  valet  ac  si  dixisset,  non  alia  illi  moriendi  fuit  ratio,  nisi  quia  nos  diligebat.  Idque  quo  tempore  inimici  eramus:  quemadmodum  Rom.  5,  10,  docet.  Tradidit  se  ipsum.  Nullis  verbis  rite  exprimi  potest  quantum  hoc  sit.  Quis  enim  oratione  assequatur  quanta  sit  excellentia  filii  Dei?  is  vero  se  ipsum  pretium  nobis  redimendis  statuit.  Sub  verbo  tradendi  includitur  totus  fructus,  qui  ad  nos  redit  ex  morte  Christi:  nempe  quod  sacrificium  est  expiationis,  ablutio,  satisfactio  ete.  Neque  parum  energiae  habet  pro  me:  quia  non  satis  fuerit  Christum  pro  mundi  salute  mortuum  reputare,  nisi  sibi  quisque  effectum  ac  possessionem  huius  gratiae  privatim  vendicet.  21.  Non  obiicio.  Subest  etiam  magna  emphasis  huic  verbo:  nam  cuius  et  quam  horrendae  ingratitudinis  est,  tam  inaestimabilem  Dei  gratiam,  tantoque  pretio  acquisitam,  contemnere?  Huius  autem  sacrilegii  accusat  pseudoapostolos,  qui  uno  Christo  non  contenti  alia  etiam  salutis  subsidia  ingerebant.  Reiicitur  enim  Dei  gratia,  nisi  aliis  omnibus  renuntiantes,  solum  Christum  amplectimur.  Porro  quid  reliquum  est  homini,  postquam  Dei  gratiam  repudiando,  indignum  se  ipsa  reddidit?  Si  enim  per  legem.  G  r  a  t  i  s  pro  frustra  capitur:  hoc  est,  nullam  esset  operae  pretium  in  morte  Christi:  vel,  nulla  mercede  Christus  esset  mortuus.  Ista  enim  merces  est  mortis,  quod  peccata  nostra  expiando  patri  nos  reconciliavit.  Hinc  sequitur,  eius  gratia  nos  iustificari:  ergo  non  operibus.  De  lege  caeremoniali  papistae  interpretantur:  sed  quis  non  videt  ad  totam  legem  patere?  Perinde  enim  est  ac  si  diceret  Paulus:  Si  promeremur  ipsi  iustitiam,  ergo  frustra  Christus  passus  est:  nam  ideo  passus  est  ut  eam  nobis  acquireret.  Quid  opus  fuit  aliunde  nobis  comparari,  quod  dare  ipsi  nobis  possumus?  Certe  si  mors  Christi  redemptio  nostra  est,  ergo  captivi  eramus:  si  satisfactio,  ergo  eramus  de-