10.1:200  les  commandemens.  Et  sainct  Paul  parlant  aux  Chrestiens,  ne  leur  baille  point  une  nouvelle  forme  pour  servir  a  Dieu:  mais  plustost  les  ramene  a  la  loy  comme  quant  il  dict  au  xiii  des  Romains,  Celuy  qui  aime  son  prochain  a  accomply  la  loy.  Car  ces  commandemens:  tu  ne  paillarderas  point,  tu  ne  seras  ne  meurtrier,  ny  larron,  sont  compris  en  ce  sommaire:  Tu  aymeras  ton  prochain  comme  toy  mesmes.  Item  au  5e  des  Galatiens:  Servez  l'un  l'autre  en  charite.  Car  toute  la  Loy  est  accomplie  en  ce  mot:  Tu  aymeras  ton  prochain  comme  toymesmes.  Item  au  6e  des  Ephesiens:  Enfans  obeissez  a  voz  peres  et  meres.  Car  cela  est  iuste  comme  il  est  escrit:  honore  ton  pere  et  ta  mere,  qui  est  le  premier  commandement  avecques  promesses.  Brief  l'Ecriture  est  plaine  de  telz  tesmoignages.  Et  quiconques  nye  que  la  Loy  ne  soit  commune  a  tous  fidelles  tant  Chrestiens  que  Iuifz  cestuy  la  renonce  plainement  Dieu  et  sa  iustice.  Car  toute  perfection  de  sainctete  est  contenue  en  la  loy.  Au  reste  quant  l'Escriture  dict  que  la  Loy  a  prins  fin  fr  la  venue  de  Iesus  Christ,  cela  s'entend  des  ceremonies:  comme  c'est  une  doctrine  si  claire  qu'elle  est  tournee  quasi  en  proverbe:  Que  la  Loy  moralle  dure  a  iamais,  combien  que  la  loy  ceremonielle  soit  abolie.  Item  quant  l'Escriture  dict,  que  les  Chrestiens  sont  afranchiz  de  la  servitude  de  la  Loy,  cela  s'entend  avec  les  conditions  et  qualitez  qui  y  estoient  apposees,  a  ce  qu'elle  ne  nous  tienne  plus  en  sa  rigueur  pour  nous  condamner.  Mais  cependant  la  doctrine  ne  laisse  point  d'avoir  sa  vigueur.  Et  quiconques  veult  obeir  a  Dieu,  il  doit  la  conformer  sa  vie  et  s'y  assubicctir.  Parquoy  il  est  a  conclurre  que  frere  Matthieu  Orris  banissant  la  Loy  des  dix  parolles  de  l'eglise  chrestienne  blaspheme  trop  villainement  contre  Dieu,  qui  en  est  lautheur,  foullant  aux  piedz  son  authorite.  Car  il  nous  doit  souvenir  que  sainct  Iaques,  voulant  monstrer  que  c'est  a  Dieu  qu'il  appartient  de  saulver  et  damner,  nous  ramene  a  ce  point  la,  qu'il  a  donne  sa  Loy  pour  gouverner  noz  ames.  Vray  est  que  le  commandement  du  Sabbat  est  bien  ceremonial  en  partie:  mais  quant  a  la  substance  et  verite  il  demeure  en  son  entier  et  doit  valloir  entre  les  Chrestiens:  combien  que  ce  qui  concernoit  les  umbres  et  figures  aict  cesse.  Mesmes  cela  faict  contre  ce  cafart.  Car  en  toutes  les  dix  parolles  on  ne  trouvera  rien  qui  appartienne  aux  ceremonies  anciennes  excepte  l'observation  du  Sabbat.  Comme  aussi  S.  Augustin  en  parle  notamment  au  livre  de  spiritu  et  litera.  Dont  il  s'ensuit  que  la  deffense  de  faire  images  est  comprinse  en  la  Loy  moralle,  a  laquelle  tous  ceux  qui  ne  veullent  estre  subiectz  reiectent  le  ioug  de  Dieu.  Frere  Matthieu  Oris  adiouste  consequemment: