58:20  20  d'Isaac  et  d'Ismael,  afin  que  la  nouveaute  ne  nous  trouble  point  outre  mesure,  et  que  nous  bataillions  constamment  contre  toutes  doutes  qui  nous  pourroyent  venir  en  fantasie,  toutesfois  et  quantes  que  nous  voions  un  petit  nombre  de  gens  qui  adorent  Dieu,  et  que  nous  voions  une  multitude  quasi  infinie  de  ceux  qui  se  rebecquent  a  l'encontre  de  lui,  et  qui  ne  savent  que  c'est  de  porter  son  ioug.  Or  ceste  doctrine  nous  est  auiourd'hui  bien  necessaire.  Car  comment  est-ce  que  Dieu  besongne  de  nostre  temps?  Quand  il  a  voulu  remettre  son  Evangile  au  dessus,  par  quel  bout  a-il  commence?  Quelles  gens  a-il  appelez?  Encore  maintenant,  si  nous  iettons  la  veue  sur  tout  le  monde,  nous  verrons  en  premier  lieu  que  en  Asie,  qui  est  la  plus  grande  portion  du  monde,  assavoir  l'Affrique,  qui  est  de  mesme.  Et  quand  est  de  l'Europpe  (qu'on  appelle  Chrestiente)  qu'on  regarde  ce  qui  est  et  en  Italie,  et  en  France,  et  aux  autres  lieux,  et  on  verra  que  le  diable  y  a  la  vogue,  et  que  les  supposts  de  l'Antechrist,  qui  sont  ennemis  mortels  de  l'Eglise,  quelque  profession  qu'ils  facent:  on  les  verra  estre  comme  les  estoilles  du  ciel,  et  comme  le  gravier  de  la  mer:  en  sorte  qu'on  diroit  qu'il  n'y  a  que  pour  eux:  et  de  fait,  ils  s'en  savent  bien  vanter:  car  ils  font  bouclier  de  cela  pour  despiter  Dieu,  et  aussi  pour  s'endurcir  en  leur  fierte.  Ils  se  moquent  de  ce  que  nous  sommes  si  peu  de  gens:  et  que  cependant  nous  voulons  estre  tenus  pour  l'Eglise.  Or  de  nostre  part,  nous  sommes  mesprisez  et  reiettez:  et  puis  il  s'en  faut  beaucoup  que  nous  approchions  de  ces  grans  peuples  lesquels  s'eslevent  contre  nous:  bref  on  diroit  que  nous  serions  comme  trois  grains  de  ble  sous  un  grand  monceau  de  paille.  Et  toutesfois  si  estce  que  nous  avons  tesmoignage  de  Dieu,  qu'il  nous  tient  et  avoue  pour  ses  domestiques.  Car  il  n'y  a  point  d'Eglise,  sinon  qu'elle  soit  coniointe  a  nostre  Seigneur  Iesus  Christ,  qui  en  est  le  chef.  Quand  cela  defaut,  tout  le  reste  va  en  dissipation  et  en  ruine,  comme  dit  S.  Paul.  Or  nous  sommes  unis  au  Fils  de  Dieu  par  la  Foy  de  son  Evangile,  qui  est  le  lien  certain  et  infallible.  Et  comment  pourrons  nous  iuger  que  nous  soions  l'Eglise,  veu  que  nous  ne  sommes  rien  en  comparaison  des  incredules,  qui  sont  enflez  a  cause  de  leur  grandeur,  et  de  toutes  leurs  qualitez,  lesquelles  ils  savent  bien  mettre  en  avant  a  pleine  bouche?  Or  ne  nous  estonnons  point  de  tout  cela:  veu  que  Dieu  nous  a  donne  approbation  en  la  personne  de  nostre  pere  Isaac,  que  l'Eglise  estoit  comme  une  maison  deserte,  et  qu'il  n'y  avoit  point  de  lignee,  et  qu'il  n'avoit  pas  grand  nombre  de  gens  et  toutesfois  qu'il  ne  laissoit  pas  de  la  tenir  comme  un  thresor  cache:  contentons-nous  de  cela.  Et  au  reste,  la  personne  d'Ismael  aussi  doit  bien  estre  notee:  car  ii  estoit  sorti  de  la  maison  d'Abraham,  qui  estoit  pour  lors  l'Eglise  seule  en  ce  monde:  il  portoit  la  circoncision,  comme  s'il  eust  este