48:20  loqui  illic  de  se  Davidem,  ut  conditionem  regni  Christi  describat.  Psalmus,  inquam,  ille  communem  totius  ecclesiae,  quae  corpus  est  filii  Dei,  imaginem  continet.  Proinde  in  capite  ipso,  quae  illic  habentur,  impleri  oportuit,  sicuti  impleta  evangelistae  referunt.  Nunc  si  quis  obiiciat,  non  competere  in  Iudam,  quae  in  hostes  Davidis  fuerant  dicta:  promptum  erit  excipere,  eo  ipso  competere  potius,  quia  David  non  se  illic  solum  respiciat,  quasi  ab  ecclesiae  corpore  separatum:  sed  potius  tanquam  unum  ex  Christi  membris,  adeoque  eius  imaginem  gestans  prodeat  in  medium  illius  nomine.  Hanc  singularem  personam  Davidi  fuisse  impositam  quisquis  tenebit,  ut  Christum  figuraret:  non  mirabitur  huic  aptari,  quod  in  illo  fuit  adumbratum.  Quare  etsi  totam  ecclesiam  comprehendat1),  a  capite  sumit  initium,  ac  praecipue  describit  quae  passurus  esset  Christus  ab  impiorum  manu.  Scimus  enim  ex  Pauli  doctrina  (Col.  1,  24),  quidquid  malorum  patiuntur  sancti,  afflictionum  Christi  esse  partes  et  ad  complementum  earum  spectare.  Illa  certe  connexio  ac  series  a  Davide  fuit  observata,  vel  potius  a  spiritu  Dei,  qui  per  os  Davidis  totam  ecclesiam  docere  voluit.  Quod  autem  de  Christi  persequutoribus  communiter  dictum  est,  iure  in  antesignanum  "confertur:  cuius  ut  impietas  et  scelus  eminet,  sic  poena  conspicua  et  memorabilis  esse  debet.  Si  quis  rursum  obiiciat,  imprecationes  referri  in  Psalmo,  non  vaticinia:  ideoque  improprie  Petrum  colligere,  hoc  oportuisse  fieri:  facilis  est  solutio.  Neque  enim  David  perverso  aut  vitioso  carnis  affectu  ad  vindictam  expetendam  incitatus  fuit,  sed  spiritum  habuit  ducem  ac  directorem.  Vim  ergo  praedictionum  habent,  quaecunque  instinctu  spiritus  precatus  est,  quia  non  alia  spiritus  exposcit  quam  quae  praestare  Deus  apud  se  decrevit,  et  nobis  quoque  vult  polliceri.  Quum  autem  duo  ex  Psalmis  diversa  testimonia  citet  Petrus,  prius  huc  tendit  :  Iudam  cum  nomine  et  familia  fuisse  delendum,  ut  vacuus  esset  locus:  alterum  vero,  quod  ex  Psalmo  centesimo  nono  adducitur,  fuisse  alium  subrogandum,  qui  in  eius  vicem  subiret.  Pugnare  quidem  in  speciem  videntur  habitatio  deserta  et  successio  :  sed  quia  priore  loco  spiritus  tantum  e  medio  tollendos  ecclesiae  adversarios  pronuntiat,  ut  locum  vacuum  et  sine  habitatore  relinquant,  quantum  ad  ipsos  pertinet:  hoc  non  impedit,  quin  alienus  postea  successor  locum  desertum  occupet.  Imo  hoc  poenae  gravitatem  auget,  quod  honos,  postquam  ablatus  est  indigno,  transfertur  ad  alienum.  Et  episcopatum  eius.  Non  potuit  magis  proprie  hebraica  vox  transferri,  pecudah:  Praefecturam  enim  significat,  ab  inspectione  sic  dictam.  Nam  qui  uxorem  interpretantur,  eos  contextus  refellit.  De  uxore  enim  sequitur  proximo  versu:  Ut  fiat  *)  Comprehendens.