45:20  19.  Ego  sum  Gabriel.  His  verbis  significat  angelus,  non  sibi,  sed  Deo  a  quo  missus  est,  et  cuius  mandatum  pertulit,  abrogatam  esse  fidem,  atque  ita  Zachariae  exprobrat,  quod  in  Deum  contumeliosus  fuerit.  Adstare  coram  Deo  perinde  valet  ac  praesto  esse  ad  obsequium,  ac  si  diceret,  se  non  hominem  esse  mortalem,  sed  coelestem  spiritum,  nec  temere  advolasse,  sed  ut  decet  ministrum  Dei  fideliter  defunctum  esse  suo  officio:  unde  sequitur,  Deum  promissionis  autorem  in  persona  sui  nuntii  indigne  laesum  et  contemptum  esse.  Eodem  tendit  illa  Christi  sententia  (Luc.  10,16),  Qui  vos  spernit,  me  spernit,  ete.  Quanquam  enim  non  e  coelo  ad  nos  defertur  evangelii  praedicatio  per  angelos,  quia  tamen  eam  a  se  profectam  tot  miraculis  testatus  est  Deus,  et  Christus,  princeps  angelorum  ac  caput,  eam  .semel  ore  suo  publicavit,  ut  in  perpetuum  sanciret,  non  minor  illi  constare  debet  maiestas,  quam  si  testes  haberet  omnes  angelos  palam  e  coelo  clamantes.  Imo  apostolus  in  epistola  ad  Hebraeos  vocem  evangelii,  quae  in  ore  hominum  personat,  legi  per  angelos  latae  aequare  non  contentus  argumentum  a  minori  ad  maius  deducit:  Si  sermo,  inquit,  per  angelos  allatus  non  impune  reiectus  fuit,  multo  minus  vindictam  effugient,  qui  spernunt  hodie  Christi  vocem,  cuius  est  coelum  et  terram  concutere  (Hebr.  10,  28.  12,  25).  Discamus  ergo  fidei  obedientiam  praestare  Deo,  quam  pluris  facit  omnibus  victimis.  Gabriel  sonat  robur,  aut  fortitudinem,  vel  principatum  Dei,  ac  nomen  hoc  angelo  nostra  causa  fuit  inditum,  ut  discamus  nihil  angelis  proprium  affingere,  quum  divinum  sit  quidquid  habent  virtutis.  Participium  Tiapsaxyjxac  temporis  quidem  est  praeteriti,  sed  in  eiusmodi  verbis  satis  notum  est  praeteritum  sumi  praesentis  loco,  praesertim  ubi  actus  continuus  notatur.  Porro  angelus,  ut  nuper  dictum  est,  perpetuum  se  Dei  ministrum  his  verbis  esse  asserit.  Evangelizandi  verbum  crimen  Zachariae  amplificat,  quod  Deo  rem  laetam  et  optabilem  benigne  pollicenti  ingratus  fuerit.  20.  Et  ecce  eris  tacitus.  Genus  hoc  poenae  consentaneum  fuit  Zachariae  infligi,  ut  mutus  promissionis  eventum  exspectet,  quam,  quum  silentio  audire  deberet,  obstrepero  suo  murmure  quasi  abruperat.  Fides  suum  silentium  habet,  ut  Dei  verbo  audientiam  faciat.  Deinde  suas  quoque  habet  loquendi  vices,  ut  respondeat,  Amen,  secundum  illud  (Hos.  2,  23),  Dicam  illis:  Populus  meus  vos:  et  ipsi  dicent  mihi,  Tu  Deus  noster.  Quia  vero  Dei  verbo  temere  obloquutus  erat  Zacharias,  haec  ei  gratia  non  conceditur,  ut  statim  prorumpat  in  gratiarum  actionem,  sed  illi  ad  tempus  eripitur  linguae  usus,  quae  nimium  festinaverat.  Clementer  tamen  Deus  poenam  mitigat.  Primum,  quia  eam  decem  mensibus  finit:  deinde,  quia  Zachariam  beneficio,  quo  indignus  erat,  privari  tamen  non  patitur.  Ea-