43:20  iram  Dei,  ut  nulla  sit  spes  veniae,  quod  scilicet  tanta  sit  scelerum  congeries,  ut  merito  iam  Deus  sumpturus  sit  ultimam  vindictam,  quia  mediocris  castigatio  non  sufficeret.  Nunc  ergo  tenemus  consilium  prophetae.  Iam  venio  ad  ipsa  verba:  quia  spreverunt,  inquit,  legem  Iehovae.  Hic  damnat  Iudaeos  apostasiae,  quod  abiecerint  cultum  Dei,  et  puram  religionis  doctrinam.  Est  hoc  gravissimum  crimen.  Videmus  ergo  prophetam  hic  libere,  et  qua  decebat  sinceritate  damnare  scelera  populi  sui,  ideoque  non  fuisse  locum  calumniae,  si  postea  severus  esset  censor  et  iudex  contra  Israelitas:  quia  scilicet  hic  non  leviter  attingit  delictum  aliquod  in  tribu  Iehudah,  sed  dicit  esse  apostatas  et  perfidos,  qui  abiecerint  legem  Dei.  Sed  quaeritur  cur  tam  atrociter  accuset  Iudaeos  propheta,  quum  tamen  adhuc  vigeret  illic  religio,  quemadmodum  vidimus  in  vaticiniis  Hoseae.  Sed  facilis  responsio  est,  illic  etiam  corruptum  fuisse  Dei  cultum,  quanquam  non  ita  palam  desciverant  ut  Israelitae.  Nam  apud  Israelitas  manebat  quidem  circumcisio,  sed  sacrificia  eorum  polluta  erant,  templa  erant  quasi  lupanaria:  putabant  se  Deum  colere,  sed  quia  templum  fuerat  erectum  in  Beth-el  contra  mandatum  Dei,  fuit  totus  ille  cultus  plenus  sacrilegiis*  Iudaei  erant  aliquanto  puriores:  sed  scimus  ipsos  quoque  degenerasse  a  genuino  Dei  cultu.  Quare  non  immerito  propheta  hic  dicit  sprevisse  legem  Dei.  Sed  notanda  est  expositio,  quae  mox  additur,  quod  scilicet  non  custodierint  eius  statuta.  Quomodo  igitur  probat  Amos  Iudaeos  fuisse  foedifragos,  et  repudiata  lege  Dei  delapsos  fuisse  ad  impias  superstitiones?  quia  scilicet  non  custodierunt  praecepta  Dei.  Videtur  tamen  hic  nimium  aspere  ipsos  tractare.  Fieri  enim  poterit  ut  quis  vel  per  negligentiam  et  incuriam,  vel  alio  vitio  non  prorsus  servet  mandata  Dei,  et  tamen  non  ideo  sit  foedifragus,  neque  apostata.  Respondeo,  in  his  prophetae  verbis  non  perstringi  duntaxat  negligentiam  in  Iudaeis,  sed  damnari  ipsos,  quod  data  opera,  hoc  est,  scientes  et  volentes  discesserint  a  mandatis  Dei,  excogitaverint  sibi  diversos  cultus.  Hoc  est  igitur  non  servare  praecepta  Dei,  quum  homines  non  manent  sub  eius  lege,  sed  audacter  sibi  fabricant  novos  cultus,  non  respiciunt  quid  Deus  iubeat,  sed  arripiunt  quidquid  illis  placet,  ac  venit  ipsis  mentem.  Hoc  crimen  nunc  propheta  damnat  in  Iudaeis.  Hinc  etiam  sequitur  ipsos  sprevisse  legem  Dei.  Neque  enim  unquam  sibi  tantum  sumerent  homines,  ut  aliquid  mutarent  in  Dei  cultu,  sed  valeret  apud  eos  quae  debet  Dei  reverentia:  si  hoc  esset  illis  persuasum,  non  esse  sapiendum  nisi  ex  ore  Dei,  certe  continerent  se  sub  eius  mandatis.  Ubi  ergo  sibi  comminiscuntur  novos  cultus  et  fictitios,  satis  hoc  ipso  demonstrant  se  non  curare  quid  velit  Dominus,  quid  praecipiat,  quid  vetet.  Hoc  igitur  modo  spernunt  eius  legem,  vel  etiam  abiiciunt.