41:20  Hic  ergo  locus  nos  admonet,  ne  prostituamus  nos  hominum  libidini  in  servitutem.  Serviat  quisque  proximis  suis,  quantum  fert  caritas:  deinde  ut  postulat  etiam  usus.  Interea  nemo  mala  conscientia  flecti  se  sinat  in  hanc  vel  illam  partem:  quia  ubi  desinit  esset  liber,  cogetur  perferre  quascunque  contumelias,  et  obsequi  foedissimis  imperiis  :  quemadmodum  videmus  contingere  et  lenonibus  et  aliis,  qui  vel  avaritiae  principum  serviunt,  vel  ambitioni,  vel  crudelitati.  Ubi  enim  semel  obnoxii  esse  coeperunt,  sunt  miserrima  mancipia,  neque  possunt  effugere  extremas  quasque  necessitates,  quin  contumeliose  serviant,  et  centies  provocent  contra  se  et  Deum  et  homines.  Nunc  sequitur,  18.  Tunc  profectus  est  rex  in  palatium  suum1  et  pernoctavit  in  ieiunio  (ieiunus)  et  instrumenta  musica  (alii  vertunt  coenam,  ve],  mensam:  sed  hoc  non  quadraret:  quia  prius  dixit  regem  pernoctasse  ieiunum  :  melius  igitur  convenit  diversa  interpretatio,  quod  instrumenta  musica)  non  fuerint  allata  coram  ipso  (atque  ita  cessaverint  omnes  laetitiae  et  oblectationes),  et  somnus  (etiam)  discessit  ab  eo.  Hic  refert  Daniel  seram  regis  poenitentiam:  quia  etiamsi  fuerit  in  maximo  luctu,  non  correxit  tamen  suum  delictum.  Et  hoc  multis  accidit,  qui  non  obduruerunt  ad  contemptum  Dei  et  pravitatem:  trahuntur  ab  aliis,  et  sibi  in  vitiis  suis  displicent:  interea  tamen  pergunt.  Utinam  huius  mali  magis  rara  essent  exempla.  Sed  passim  occurrunt  ante  oculos  nostros.  Darius  ergo  hic  nobis  proponitur  quasi  medius  inter  improbos  et  sceleratos,  et  inter  rectos  et  cordatos.  Qui  improbi  sunt,  non  dubitant  Deum  in  se  provocare,  et  excusso  omni  metu  et  pudore  lasciviunt  in  suis  concupiscentiis.  Qui  autem  reguntur  Dei  timore,  etiamsi  dura  certamina  sustineant  cum  carne,  sibi  tamen  fraenum  iniiciunt,  et  cohibent  perversos  suos  affectus.  Sunt  alii  medii,  qui  nondum,  ut  dixi,  obstinati  sunt  in  sua  malitia,  imo  sibi  non  placent  in  corruptelis:  et  tamen  eas  sequuntur  quasi  funiculis  essent  devincti.  Talis  fuit  Darius.  Nam  ubi  oportuerat  ipsum  constanter  repellere  procerum  calumniam,  quum  videret  se  fuisse  ab  illis  ita  illaqueatum,  atque  viriliter  se  adversus  eos  gerere,  imo  exprobrare  quod  ita  facilitate  eius  abusi  essent,  adeo  non  fecit,  ut  potius  obsequutus  sit  eorum  furori.  Interea  luget  in  palatio  suo,  a  cibo  et  omnibus  delitiis  abstinet.  Ita  ostendit  malum  sibi  non  placere,  quod  tamen  ipse  suscepit.  Videmus  ergo  non  sufficere,  si  dum  peccamus,  mordeat  nos  propria  conscientia,  et  tristitiam  aliquam  nobis  exprimat:  ultra  progrediendum  est,  ut  scilicet  tristitia  adducat  nos  usque  ad  poenitentiam,  quemadmodum  etiam  Paulus  docet  (2.  Cor.  7,  10).  Darius  autem  quasi  in  luto  illo  haesit:  quum  lugeret,