37:20  fallaciis  illaqueant:  interea  in  amentiam  totius  mundi  invehitur,  quod  tanto  fervore  omnes  ad  superstitionem  ferantur,  et  sibi  quisque  magister  sit  in  fingendis  idolis.  Concludit  nullum  genus  hominum  ab  isto  crimine  purum  esse:  divites  simul  et  pauperes  reos  ac  convictos  teneri.  Divites  enim  conflare  deos  ex  auro  vel  argento,  pauperes  ex  ligno  selecto.  Unde  ostendit  mira  insania  abripi  cunctos  homines:  qui,  tametsi  desint  ipsis  facultates,  tamen  eximium  aliquid  habere  expetunt  pro  deorum  cultu.  Volunt  enim  homines  praesentem  habere  Deum:  atque  hoc  initium  et  fons  idololatriae  est:  quia  Deus  per  simulacrum  nobis  non  adest,  sed  per  verbum  suum  et  spiritus  virtutem.  Quamvis  autem  et  gratiae  suae  et  bonorum  spiritualium  imaginem  nobis  obiiciat  in  sacramentis,  non  alio  tamen  spectat,  quam  ut  sursum  ad  se  nos  invitet.  Interea  caecorum  hominum  ineptias  propheta  perstringit,  quod  in  idolis  concinne  ornandis  plus  quam  industrii  sint  et  curiosi.  21.  (An  nescitis.)  Postquam  derisit  gentium  stuporem  et  insaniam  propheta,  ad  Iudaeos  sese  convertit.  Ut  enim  omnes  ad  superstitionem  proclives  sumus,  ita  facile  labimur,  quum  nobis  exemplum  aliquod  ob  oculos  positum  est.  Quum  autem  Iudaei  in  exilio  Babyloniis  permixti  essent,  quotidie  foedissima  idololatriae  exempla  cernere  coacti,  poterant  abripi  ad  impiam  imitationem.  Praevenit  ergo  in  tempore  Isaias,  atque  admonet  ne  talium  rerum  conspectu  moveantur.  Rogat  annon  edocti  sint,  atque  didicerint  quis  sit  Deus?  Putant  plerique  interpretes  idem  et  unum  hic  repeti  :  liquere  scilicet  ex  mundi  fabrica  nihil  minus  esse  consentaneum  quam  in  ligno  et  lapide,  auro  et  argento  Deum  quaerere.  Sed  duo  esse  membra  licebit  colligere  ex  contextu.  Si  pergeret  in  obiurgandis  gentibus,  testes  non  alios  produceret  quam  coelum  et  terram.  Sed  quia  Iudaeos  alloquitur  qui  familiariter  ex  lege  edocti  erant,  ad  eos  coarguendos  testimonia  distincte  profert  tam  ex  naturae  ordine,  quam  ex  voce  ipsa  Dei:  ac  primum  quidem  generaliter  quaerit  an  ignorent?  Duos  postea  modos  subiicit,  quibus  verum  Deum  a  falsis  discernere  oportuerat.  Prior  est  ex  verbi  auditu.  Ideoque  diserte  exprimit  :  An  non  vobis  annuntiatum  est  ?  an  non  audistis?  Posterior  est  ex  pulcherrimo  hoc  theatro,  ubi  sursum  et  deorsum  refulget  Dei  gloria.  Si  ad  exteros  et  profanos  homines  fuisset  sermo,  contentus  hac  secunda  demonstratione  fuisset:  sicuti  etiam  a  Paulo  factum  videmus.  Nam  quia  cum  Lystrensibus  negotium  erat,  ad  quos  nulla  pervenerat  notitia  coelestis  doctrinae,  naturalibus  tantum  argumentis  utitur:  quia  Deus  dans  pluvias  et  tempus  serenum,  se  ajxapTupov  minime  reliquerit.  Propheta  autem  apud  Iudaeos  de  vera  pietate  disserens  legem  omittere  minime  debuit,  quae  bis  inexcusabiles