32:20  violentiam,  et  barbaram  atrocitatem  crepant.  Istae  sunt  ebullitiones  de  quibus  loquitur  propheta,  dum  impii  pudoris  et  modestiae  obliti,  se  quidvis  pro  libidine  acturos  iactare  non  dubitant.  Atque  haec  est  durities  sermonis,  quam  neque  ratio,  neque  timor,  neque  honesti  respectus  cohibet  quin  perrumpat  quocunque  tulerit  effraenis  licentia.  Iam  sicut  haec  gravis  tentatio  fuit  olim  fidelibus,  cernere  in  ecclesia  prorsus  confusam  dominationem:  ita  hodie  docemur,  quoties  praepostere  regitur  ecclesia,  vel  potius  opprimitur,  nihil  novi  accidere:  sed  invocandum  esse  Deum,  qui  post  longam  dissimulationem  tandem  servis  suis  opitulari  solet.  5.  (Populum  tuum.)  Ubi  de  ebria  et  petulanti  verborum  iactantia  loquutus  est,  facta  quoque  describit,  quod  immaniter  Dei  ecclesiam  affligant.  Si  indignum  est  a  profanis  regibus  subditos  suos  iniuste  premi,  certe  electum  Dei  populum,  qui  peculiaris  est  eius  haereditas,  tyrannide  conteri,  multo  minus  est  tolerabile.  Iam  'meminerimus  dictari  hic  nobis  precandi  formam,  quoties  scelerati  homines,  ac  praesertim  hostes  domestici,  nobis  et  reliquis  fidelibus  molesti  sunt.  Nam  quia  non  tantum  Deo  curae  est  nostra  salus,  quia  homines  sumus  ab  ipso  conditi  :  sed  etiam  pretiosa,  quia  nos  in  peculio  suo  censet  :  si  quid  patimur  iniuriae,  familiarius  ad  eum  confugere  licet.  Sequitur  altera  amplificatio,  quod  ne  viduis  quidem  parcant,  pupillos  interficiant  ac  peregrinos.  Atqui  Deus  postquam  in  genere  praecepit  ut  iustitiam  et  aequitatem  mutuo  colamus,  praecipue  tamen  viduas  et  peregrinos  et  pupillos  commendat:  quia  eo  plus  merentur  humanitatis  et  misericordiae,  quo  magis  obnoxii  sunt  iniuriis.  Quo  magis  se  prodit  impietas  et  Dei  contemptus,  ubi  promiscue  in  eos  saeviendo  non  modo  violatur  ius  commune,  sed  privilegium  quod  Deus  ad  tuendam  eorum  salutem  ferre  dignatus  est.  Itaque  magis  in  se  provocant  iram  Dei  qui  crudeliter  in  illos  insurgunt.  Et  certe  pueris,  quia  se  defendere  nequeunt,  aetas  ipsa  infirma  praesidio  est  etiam>  adversus  canes  et  feras  bestias.  Quam  turpe  est  igitur  et  monstruosum  hominibus,  vires  suas  contra  eos  experiri?  Porro  quasi  in  speculo  cernimus  quam  deformis  tunc  fuerit  in  ecclesia  vastitas.  Erat  lex,  erant  iudicia  divinitus  instituta:  videmus  tamen  ut  horribili  modo  exundaverit  omne  genus  scelerum.  Ergo  sollicite  cavendum  est  ne  quid  tale  nobis  usu  veniat:  quod  si  tamen  contingat  peregrinos  iniuste  vexari,  raptari  viduas  in  praedam,  spoliari  pupillos  :  rogandus  est  Deus  ut  eorum  patrocinium  suscipiat,  sicuti  exemplo  suo  propheta  nos  ad  levandas  eorum  miserias  hortatur.  7.  Et  dixerunt,  Non  videbit  Deus,  non  cognoscet  Deus  Iacob.  8.  Intelligite  insipientes  in  populo:  et  stulti  quando  sapietis?  9.  Qui  plantavit  aurem,  an