31:20  la  regle  infallible  nous  en  est  yci  presente.  Il  n'y  a  livre  ou  on  trouve  de  plus  expresses  et  magnifiques  louanges,  tant  de  la  singuliere  liberalite  de  Dieu  envers  son  Eglise,  que  de  toutes  ses  oeuvres:  il  n'y  a  livre  auquel  soyent  recitees  tant  de  delivrances,  ni  auquel  les  tesmoignages  et  experiences  de  sa  providence  et  solicitude  paternelle  envers  nous,  soyent  si  richement  exaltez  et  d'une  facon  si  authentique.  Brief,  il  n'y  a  livre  auquel  plus  parfaitement  nous  soit  enseignee  la  maniere  de  louer  Dieu,  ou  auquel  nous  soyons  plus  vivement  solicitez  a  cest  exercice  de  piete.  D'avantage,  ia  soit  que  ce  livre  soit  plein  de  tous  enseignemens  qui  peuvent  servir  pour  reformer  nostre  vie  a  toute  sainctete,  droiture  et  iustice,  principalement  toutesfois  il  nous  enseignera  et  duira  a  porter  la  croix,  qui  est  une  vraye  espreuve  de  nostre  obeissance,  ascavoir  d'autant  que  renoncans  a  nos  propres  affections,  nous-nous  soumettons  entierement  a  Dieu,  et  le  laissons  tellement  nous  gouverner  et  disposer  nostre  vie,  que  les  miseres  qui  sont  les  plus  rudes  et  ameresr  a  nostre  nature,  nous  devienent  douces,  d'autant  qu'elles  procedent  de  luy.  Pour  le  dernier,  non  seulement  nous  y  trouverons  les  louanges  generales  de  la  bonte  de  Dieu  lesquelles  enseignent  aux  hommes  de  se  reposer  en  luy  seul,  et  y  prendre  tout  leur  contentement,  afin  que  les  fideles  de  tout  leur  coeur  attendent  de  luy  en  toutes  leurs  necessitez  un  secours  asseure  :  mais  nous  trouverons  aussi  que  la  remission  gratuite  des  pechez,  laquelle  seule  appaise  Dieu  envers  nous,  et  nous  acquiert  tranquillite  de  conscience  devant  luy,  y  est  tellement  preschee  et  magnifiee,  que  nous  ne'  pouvons  pas  dire  que  rien  y  defaille  de  ce  qui  concerne  la  science  du  salut  eternel.  Au  reste,  si  les  lecteurs  vienent  a  sentir  quelque  fruit  et  proufit  du  labeur  que  i'ay  prins  a  escrire  ces  Commentaires,  ie  veux  bien,  qu'ils  scachent  que  l'experience  que  i'ay  eue  par  les  combats  esquels  le  Seigneur  m'a  exerce,  encore  qu'elle  n'ait  pas  este  des  plus  grandes,  m'y  a  toutesfois  grandement  servi  :  non  seulement  a  ce  que  ie  peusse  deduire  comment  il  faut  prattiquer  et  mettre  en  usage  toute  la  doctrine  qu'on  en  pouvoit  recueillir,  mais  aussi  a  ce  que  i'eusse  plus  grande  ouverture  a  comprendre  l'intention  de  chacun  de  ceux  qui  ont  compose  les  Pseaumes.  Et  pource  qu'entre  tous  ceux-la  David  est  le  principal,  ce  qui  m'a  beaucoup  servi  pour  entendre  plus  a  plein  les  complaintes  qu'il  fait  des  afflictions  que  l'Eglise  ha  a  soustenir  au  dedans  de  soy,  et  par  ceux  mesmes  qui  se  disent  en  estre  membres,  c'est  que  i'ay  souffert  les  mesmes  choses  ou  semblables  des  ennemis  domestiques  de  l'Eglise.  Car  combien  que  i'ensuyve  David  de  bien  loin,  et  qu'il  s'en  faille  beaucoup  que  ie  soye  a,  accomparer  k  luy:  ou  pour  mieux  dire,  combien