3:20  qui  sont  mesmes  trescertains,  et  non  suiets  à  moquerie:  au  contraire,  ceux  que  noz  adversaires  pretendent  pour  eux,  sont  pures  illusions  de  Satan,  quand  ils  retirent  le  peuple  de  l'honneur  de  son  Dieu  à  vanité.  Outre,  c'est1)  iniustement  qu'ils  nous  obiectent  les  anciens  Peres,  i'enten  les  escrivains  du  premier  temps  de  l'Eglise,  comme  s'ils  les  avoyent  favorisans  à  leur  impieté:  par  l'authorité  desquels  si  la  noise  estoit  à  desmeller2)  entre  nous,  la  meilleure  partie  de  la  victoire  viendroit  à  nostre  part.  Mais  comme  ainsi  soit  que  plusieurs  choses  ayent  esté  escrites  sagement  et  excellentement  de3)  ces  anciens  Peres:  d'autrepart,  qu'il  leur  soit  advenu  en  d'aucuns  endroits  ce  qui  advient  à  tous  hommes,  c'est  de  faillir  et  errer:  ces  bons  et  obeissans  fils,  selon  la  droiture  qu'ils  ont,  et  d'esprit  et  de  iugement  et  de  volonté,  adorent  seulement  leurs  erreurs  et  fautes;  au  contraire,  les  choses  qui  ont  esté  bien  escrites  d'eux,  ou  ils  ne  les  apperçoivent  point,  ou  ils  les  dissimulent,  ou  ils  les  pervertissent,  tellement  qu'il  semble  qu'ils  n'ayent  autre  soin  sinon  de  recueillir  de  la  fiente  parmy  de  l'or.  Et  apres  ils  nous  poursuyvent  par  grande  clameur,  comme  contempteurs  et  ennemis  des  Peres:  mais  tant  s'en  faut  que  nous  les  contemnions,  que  si  c'estoit  nostre  present  propos,  il  me  seroit  facile  d'approuver  par  leurs  tesmoignages  la  plus  grand'part  de  ce  que  nous  disons  auiourdhuy.  Mais  nous  lisons  leurs  escrits  avec  tel  iugement,  que  nous  avons  tousiours  devant  les  yeux  ce  que  dit  sainct  Paul:  c'est  que  toutes  choses  sont  nostres  pour  nous  servir,  non  pour  dominer  sur  nous:  et  que  nous  sommes  tous  à  un  seul  Christ,  auquel  il  faut  sans  exception  obeir  du  tout  (1  Cor.  3,  21.  22).  Ceux  qui  n'observent  point  cest  ordre,  ne  peuvent  rien  avoir  de  certain  en  la  foy:  veu  que  ces  saincts  personnages  desquels  il  est  question,  ont  ignoré  beaucoup  de  choses,  sont  souvent  divers  entre  eux,  et  mesmes  aucunesfois  contreviennent  à  eux-mesmes.  Sa-