29:20  repliques  avancer  nostre  cause.  Or  si  tost  que  nous  sommes  ainsi  visitez,  si  nous  ne  faisons  cest  honneur  a  Dieu,  de  confesser  qu'il  est  iuste  en  ce  faisant,  il  est  certain  qu'il  faudra  que  le  mal  redouble,  et  qu'il  s'augmente  iusques  a  nous  avoir  consommez.  Ainsi,  combien  que  les  hommes  nous  tourmentent,  cognoissons  que  Dieu  se  sert  d'eux  comme  d'instrumens,  et  qu'il  nous  faut  recourir  a  luy,  et  que  s'il  n'estoit  irrite  contre  nous,  que  nous  serions  en  sa  protection,  et  qu'il  ne  lascheroit  point  ainsi  la  bride  a  nos  ennemis.  Quand  les  maladies  nous  viennent,  sachons  qu'elles  sont  a  reputer  comme  les  mains  de  Dieu,  et  qu'il  les  envoye  en  telle  sorte,  qu'il  nous  visite,  et  qu'il  veut  que  nous  retournions  a  luy.  Autant  en  est-il  du  reste.  Car  il  ne  faut  point  que  nous  imaginions  que  les  creatures  soyent  conduites  a  l'abandon,  et  que  Dieu  ne  s'en  serve,  et  qu'elles  soyent  hors  de  sa  main  :  cela  est  pour  les  gens  profanes  et  incredules.  Mais  en  confessant  que  Dieu  est  createur  du  ciel  et  de  la  terre,  nous  protestons  quant  et  quant  que  tout  luy  est  suiet,  que  tout  est  conduit  par  son  conseil,  et  que  rien  ne  se  dispose  sinon  par  sa  iustice.  Voila  donc  ce  que  nous  avons  encores  a  retenir  de  ce  passage,  quand  Moyse  dit  que  Dieu  armera  l'ennemi  au  dehors,  et  qu'il  envoyera  la  frayeur  au  dedans.  En  quoy  il  signifie  qu'il  ne  faut  qu'une  ombre  pour  nous  espouvanter:  comme  aussi  il  en  a  este  traitte  au  vingthuitiesme  chapitre.  Si  Dieu  veut  susciter  de  grands  troubles  et  orages  a  l'encontre  de  nous,  il  le  fera.  Et  il  faut  bien  qu'il  dispose  tout  cela.  Mais  quand  il  nous  voudra  consommer,  sans  que  rien  se  bouge  il  faut  que  nostre  vie  soit  comme  pendante  d'un  filet  devant  nous,  qu'au  soir  nous  dirons  en  angoisse:  Qui  est-ce  qui  me  fera  voir  le  matin?  et  quand  nous  aurons  passe  la  nuict,  nous  serons  encores  en  semblable  tristesse:  nous  serons  tous  transis,  et  encores  pis.  Voila  donc  qu'emporte  ce  mot  de  Frayeur,  ou  de  douleur,  c'est  que  Dieu  fera  que  les  hommes  seront  tousiours  comme  eslourdis,  quand  ils  ne  voudront  point  fleschir  sous  ses  chastimens,  pour  venir  a  correction:  que  sans  qu'il  leur  suscite  ennemi,  sans  qu'il  leur  envoye  aucun  mal,  qu'ils  seront  la,  navrez  en  leurs  coeurs:  et  ne  sauront  pourquoy,  sinon  que  leur  ombre  leur  sera  comme  un  trouble  pour  les  tenir  confus.  Ainsi  apprenons,  si  nous  voulons  iouir  du  plus  grand  bien  et  le  plus  desirable  qui  soit  au  monde,  c'est  d'estre  en  paix  et  repos,  que  nous  n'irritions  point  nostre  Dieu,  et  qu'il  ne  nous  soit  point  ennemi.  Car  cependant  que  nous  provoquerons  son  ire,  il  faudra  que  tout  nous  soit  contraire.  Voila  ce  que  nous  avons  a  retenir  de  ce  passage.  Et  ne  cuidons  point  avoir  rien  profite,  quand  nous  aurons  mis  Dieu  en  oubli,  ou  que  pour  un  temps  nous  luy  aurons  tourne  les  dos:  comme  font  tous  contemp-