27:20  Esprit,  et  Dieu  y  veut  estre  adore.  S'il  estoit  dit  seulement  que  nos  ames  sont  temples  de  Dieu,  ce  seroit  desia  un  honneur  trop  excellent  :  mais  quand  cela  est  attribue  a  nos  corps  terrestres,  et  corruptibles,  nous  voyons  quelle  bonte  Dieu  desploye  sur  nous.  Et  ainsi  apprenons  que  ceste  doctrine  nous  appartient:  et  que  ceste  figure  qui  a  este  sous  la  Loy,  s'adresse  auiourd'huy  a  nous,  afin  que  nous  en  puissions  faire  nostre  proffit.  Et  en  quelle  sorte  ?  Le  premier  c'est  que  nous  magnifions  la  bonte  de  nostre  Dieu,  en  ce  qu'il  s'est  monstre  si  liberal,  que  de  nous  choisir  a  son  service,  non  seulement  pour  porter  les  vaisseaux  du  temple,  mais  pour  estre  les  temples  mesmes:  nous  sommes  les  autels  ausquels  ils  est  adore,  en  nos  corps  et  en  nos  ames  :  et  que  nous  ne  luy  rendons  point  un  service  corporel  qui  consiste  seulement  en  ombrage  et  figure,  mais  un  vray  service  spirituel,  d'autant  que  nos  personnes  luy  sont  dediees.  Voila  donc  par  quel  bout  il  nous  faut  commencer,  c'est  de  cognoistre  combien  nous  sommes  obligez  a  nostre  Dieu,  quand  il  a  use  d'une  telle  grace  envers  nous.  Et  au  reste,  que  nous  soyons  aussi  exhortez,  suyvant  ce  que  S.  Paul  nous  monstre  en  la  seconde  des  Corinthiens,  de  nous  separer  de  toutes  pollutions:  comme  le  Prophete  crie:  Separez-vous  de  toute  ordure,  vous  qui  portez  les  vaisseaux  du  Seigneur.  Or  S.  Paul  allegue  ce  passage-la  d'Isaie,  et  dit,  que  suyvant  telle  promesse,  c'est  bien  raison  que  nous  soyons  adonnez  a  purete,  et  d'esprit,  et  de  chair.  Car  de  faict  le  Prophete  Isaie  ne  regarde  point  au  temps  des  figures,  disant:  Nettoyez-vous,  vous  qui  portez  les  vaisseaux  du  Seigneur:  mais  il  estend  ceste  doctrine  au  royaume  de  nostre  Seigneur  Iesus  Christ.  Ainsi  donc  maintenant  il  faut  que  ce  passage  soit  accompli  en  nous.  Or  il  n'y  a  plus  de  vaisseaux  materiels,  comme  du  temps  de  la  Loy:  il  s'ensuit  donc  qu'il  nous  faut  prattiquer  ceste  doctrine  en  choses  plus  hautes:  c'est,  puis  que  Dieu  nous  a  appellez  pour  estre  membres  de  son  Fils,  et  par  ce  moyen  approcher  de  luy  tellement  qu'il  habite  en  nous,  et  que  nous  soyons  ses  temples,  que  cela  nous  incite  a  nous  adonner  a  toute  purete:  ce  que  nous  ne  pouvons  faire,  sinon  en  nous  separant  des  corruptions  de  ce  monde.  Car  nous  habitons  ici  parmi  tant  d'ordures,  qu'il  est  impossible  que  nous  n'en  soyons  infectez,  sinon  que  nous  mettions  peine  a  nous  en  recueillir:  et  mesmes  il  ne  faut  pas  que  le  mal  vienne  d'ailleurs,  car  chacun  le  trouvera  en  sa  personne.  Advisons  donc  de  nous  destourner  de  toutes  nos  meschantes  concupiscences,  de  retrancher  ce  qui  est  en  nous  de  pollu,  et  tout  ce  qui  est  du  monde  en  general,  tellement  que  nous  approchions  de  nostre  Dieu:  et  qu'ayans  quitte  ce  monde,  nous  soyons  tellement  unis  a  luy,  qu'il  nous  advoue  pour  ses  sacrificateurs.  Car  si