25:20  ut  Deum  diligant,  quam  ut  custodiant  eius  praecepta,  hinc  docemur,  fontem  et  causam  obedientiae,  amorem  esse  quo  Deum  ut  patrem  amplectimur.  Quomodo  autem  in  mille  generationes,  satius  est  ex  secundo  praecepto  petere:  quia  non  potest  ea  res  paucis  verbis  perstringi.  10.  Et  rependens  odio.  Hic  nulla  fit  mentio  vindictae  in  tres  et  quatuor  aetates.  Caeterum  qui  exponunt  Deum  impiis  beneficia  conferre  dum  in  hoc  mundo  sunt  superstites,  ut  tandem  ultimo  interitu  eos  perdat,  nimis  violenter  torquent  verba.  Nec  probabile  est  quod  afferunt  alii,  Deum  in  facie  sua  vel  in  ira  rependere  impiis  mercedem  odii.  Faciem  ergo  eorum  interpretor  quorum  contumaciae  Deus  se  opponit,  dum  prosternit  arrogantiam.  Alludit  enim  ad  eorum  superbiam  ac  audaciam  :  quia  non  dubitant  Deum  ultro  lacessere,  ac  si  ad  confligendum  animo  vel  potentia  destitueretur.  Pronunciat  ergo,  nihil  eos  protervia  illa  et  frontis  duritie  proficere,  quin  oris  improbitatem  et  frontis  impudentiam  deiiciat.  Significat  autem  eos  certo  sensuros  quod  spernunt  iudicium,  ac  si  ante  oculos  illud  repraesentaret.  Addit  praeterea  non  acturum  se  cum  impiis  qua  solet  cum  filiis  suis  clementia.  Nam  hos  ita  castigat,  ut  semper  in  salutem  utilis  sit  moderatio,  illis  vero  poenam  exitialem  denunciat  :  quia  etsi  videtur  eundem  erga  utrosque  communiter  tenere  modum,  dum  temporales  poenas  infligit,  quod  tamen  fidelibus  cedit  in  medicinam,  reprobis  praeludium  est  aeterni  interitus.  Porro  quod  dicit  se  vindictam  sumpturum  absque  mora,  videtur  non  congruere  cum  aliis  scripturae  locis,  ubi  pronunciat  se  tardum  esse  ad  iram,  clementem,  et  longae  patientiae.  Deinde  videtur  quoque  experientia  refelli  :  quia  non  statim  prosilit  ad  exigendas  poenas,  sed  lente  progreditur,  ut  morae  tarditatem  gravitate  compenset.  Atqui  tenendum  est  quod  dicitur  in  Psalmo  (90,  4),  mille  annos  quasi  diem  unum  esse  in  oculis  eius.  Itaque  ubi  eum  cunctari  putamus,  pro  sua  infinita  sapientia,  festinat  quantum  opus  est.  Dissimulat  quidem  ad  tempus,  ut  hoc  modo  ad  resipiscendum  homines  invitet:  sed  negat  moram  se  facturum:  et  pronunciat  se  instar  turbinis  repente  venturum,  ut  iudicia  sua  acceleret,  ne  in  sua  securitate  torpeant  impii.  Discamus  ergo,  quietis  et  aequis  animis  exspectare  opportunum  vindictae  tempus.  12.  Et  erit,  propterea.  Videtur  Deus  ita  ex  compacto  agere,  ut  nullam  spem  gratiae  faciat  nisi  mutuo  respondeant.  Et  certe  haec  legalis  est  loquendi  forma  ubi  interponitur  conditio,  Deum  suis  benefacturum,  si  ita  suis  obsequiis  promeriti  fuerint.  Sed  tenendum  est  quod  alibi  vidimus,  postquam  Deus  ita  pepigit,  ne  irrita  sit  promissio,  ipsum  descendere  ad  gratuitam  veniae  promissionem,  qua  indignos  sibi  reconciliat.  Ita  prima  pactio  nonnisi  ad  dam-