11:20  sit  munus  quo  vilissimi  homunciones  fungimur,  quos  magnae  ac  graves  curae  teneant  sollicitos  et  valde  perturbent,  quod  tam  rarus  appareat  evangelii  fructus,  tantus  sit  verbi  et  sacramentorum  contemptus,  tanta  fidei  et  caritatis  inopia,  tanta  peccandi  securitas,  nullus  Dei  metus,  nulla  prorsum  religio,  adeo  ut  vereamur  ne  paulatim  labamur  in  atheismum  quendam,  semel  deleta  ex  animis  religione  et  omni  Dei  timore  excusso.  Nam  quid  nobis  accesserit  ex  profligato  papismo,  non  sentimus  aliud  quam  quod  vice  abominandae  illius  sacrificulorum  lanienae  et  sacrorum  exsecrandorum  sacras  habemus  conciones,  ingentem  quidem  et  pretiosissimum  thesaurum,  felicem  commutationem,  nisi  quem  ex  ea  decerpere  fructum  debueramus  defloraret  praeriperetque  nostrorum  hominum  ignavia,  et  religionis  neglectus  tam  impius  et  pertinax,  ut  saepe  soleant  cogitare  hanc  nobis  lucem  adfulsisse  quo  graviores  irato  Domino  poenas  nostrae  impietatis  et  perfidiae  luamus.  Optamus  omnes  quidem  profectum  uberiorem,  maiores  pietatis  auctus  et  incrementa:  sed  nihil  aliud  quam  optamus.  Deploramus  istam  temporum  iniquitatem,  at  interea  nemo  est  nostrum  qui  mederi  tantis  malis  valeat.  Incertus  sum  plane  idne  nostro  contingat  vitio,  an  populi,  an  utriusque,  quod  probabilius  esse  coniicio.  Meditabamur  disciplinam  aliquam  in  ecclesiam,  quae  sic  dissoluta  est,  revocare,  id  enim  necessitas  nos  cogit  facere:  qualem  vero,  nobis  non  satis  constat.  Cuius  ecclesiae  exemplum  nobis  proponamus  imitandum,  non  satis  novimus:  tum  quod  quibus  vivatur  alibi  institutis,  et  qua  disciplina  contineatur  quisque  in  officio,  haud  satis  liquet,  tum  quod  rarissimae  sunt  eae  ecclesiae  in  quibus  non  iisdem  laboretur  morbis  et  iisdem  sit  opus  remediis.  Porro  veterem  disciplinam  restituere  haud  est  in  promptu,  nec  expedit,  partim  quod  non  suis  careat  vitiis,  et  plurima  contineat  quae,  ut  nonnihil  discedunt  ab  apostolorum  puritate,  ita  reduci  citra  conscientiarum  periculum  et  papismi  speciem  atque  suspicionem  non  facile  possunt.  Cupimus  disciplinam,  sed  quoad  eius  fieri  poterit  simplicissimam,  purissimam,  et  nihil  ab  apostolica  variantem  e  viris  vere  apostolicis.  Qua  vero  via  aggrediamur  hoc  negotium,  unde  incipiamus,  quorum  labore,  industria,  fide,  diligentia  et  favore  ad  hanc  rem  utamur,  quid  proponamus  et  deliberemus,  in  tanto  affectuum  aestu,  sinistris  suspicionibus,  religionis  neglectu,  haud  nobis  satis  compertum  est.  Morbos  sentimus  et  cognoscimus,  sed  plus  valet  arte  malum  et  indies  magis  ac  magis  invalescit,  dum  nemo  manum  medicam  admovet,  nemo  occupatur  inquirendis  antidotis,  aut  si  qui  id  dent  operam,  aut  cunctantur  nimium  aut  non  videntur  agere  ea  fide  et  diligentia  quam  res  ipsa  postulat,  atque  ita  semper  in  eodem  haeremus  luto  et  consenescimus,  nihil  veriti  ne  posteris  ecclesiam  relinquamus  omni