39:2  2  dederunt  poenas  suae  audaciae  et  temeritatis,  ut  videbimus  suo  loco.  Ergo  fuit  hoc  quasi  medium  obsidionis  tempus  quum  Deus  prophetae  praedixit  futurum  reditum  populi,  ut  videbimus.  Sed  quamvis  miseris  exsulibus  consulere  Deus  vellet,  simul  tamen  confirmavit  quod  ante  pronuntiaverat  de  futura  vindicta.  Neque  enim  restitui  populus  ante  potuit,  quam  obductus  fuisset  in  exsilium.  Fuit  autem  haec  horribilis  durities,  et  contumacia,  quod  iam  tot  flagellis  percussi  tamen  non  profecissent  quidquam.  Experti  fuerant  grave  Dei  iudicium  sub  Iehoiakim,  deinde  sub  Ioakim:  sed  memoria  illarum  cladium  statim  evanuerat,  et  perinde  agebant  securi  ac  si  nunquam  audivissent  unum  verbum  ex  ore  Ieremiae,  quanquam  non  solus  illis  minatus  fuerat,  sed  ante  ipsum  Isaias,  et  alii:  eodem  etiam  tempore  Ezechiel  qui  exsulabat  in  Chaldaea.  Ergo  ex  numero  annorum  colligimus  quanta  fuerit  populi  obstinatio.  Sed  simul  notandum  est  opportunum  fuisse  hoc  vaticinium  levandis  piorum  animis,  quia  non  procul  aberant  ab  ultima  clade:  anno  enim  undecimo  Zedechiae,  mense  quarto  urbs  capta  fuit  et  excisa,  et  populus  abductus,  et  templum  exustum:  distabant  tunc  forte  a  suo  interitu  sex  vel  septem  mensibus.  Hic  enim  nulla  fit  mentio  quoto  mense  hanc  visionem  acceperit  propheta,  sed  tantum  ponitur  annus  decimus:  initio  autem  undecimi  diximus  captam  fuisse  urbem.  Hinc  autem  melius  cognoscitur  diabolica  populi  obstinatio,  quod  quum  hostilis  exercitus  urbem  cingeret,  tenebant  tamen  Ieremiam  ipsum  captivum:  praedixerat  iam  tot  annis  quod  tunc  experientia  docebat  verum  fuisse:  per  quadraginta  annos  non  destiterat  clamare,  et  monendo  atque  hortando  ac  minando  periculum  facere  an  possent  adduci  ad  resipiscentiam.  Quum  ergo  nihil  illis  novum  accidisset,  quin  potius  certo  malorum  eventu  experirentur  Ieremiam  verum  et  fidelem  fuisse  servum  Dei,  quid  hoc  sibi  voluit,  tenere  ipsum  inclusum?  annon  erat  palam  cum  Deo  bellum  gerere?  quid  enim  illis  negotii  erat  cum  Ieremia?  Certe  non  egerat  privatam  causam,  deinde  non  somniaverat  quod  toties  illis  praedixerat.  Ergo  1