38:2  2  everterent  a  primis  fundamentis  ipsam  urbem.  Denique  his  verbis  horrendam  et  ultimam  cladem  designat,  sed  finem  simul  ostendit  cur  tam  graviter  iusserit  saevire  Deus  adversus  Iudaeos:  nempe,  inquit,  quia  servierunt  soli  et  lunae  et  stellis,  ideo  iusta  Dei  vindicta  fiet  ut  eorum  ossa  extrahantur  e  sepulcris,  quo  scilicet  sol  et  luna  et  omnes  stellae  testes  sint  iudicii  Dei.  His  verbis  oblique  perstringit  Ieremias  populi  vecordiam,  quia  putaret  se  praestare  gratum  cultum  soli  et  lunae.  Dicit  igitur  omnes  stellas  et  planetas  fore  quasi  spectatores  vindictae  quam  exiget  Deus:  quasi  diceret  totum  coelestem  exercitum  approbaturum  poenam  illam,  quia  nihil  magis  detestabile  est  creaturis  quam  dum  ad  illas  transfertur  opificis  ipsius  gloria.  Verum  quidem  est  solem  et  lunam  et  stellas  carere  sensu:  sed  propheta  hic  tribuit  illis  sensum,  quo  scilicet  excutiat  Iudaeis  stuporem  illum  in  quo  obduruerant,  dum  putabant  se  gratum  officium  praestare  soli  et  lunae.  Interea  alludit,  quemadmodum  etiam  aliis  locis  visum  est,  ad  poenam  quae  infligitur  adulteris.  Nam  si  scortum  extrahatur,  et  producatur  coram  suis  adulteris  cum  ignominia  et  probro,  haec  iustissima  est  poena:  sic  etiam,  quoniam  scortati  fuerant  Iudaei  cum  sole  et  luna  et  stellis,  ideo  ita  loquitur  propheta:  quod  scilicet  detegetur  eorum  ignominia  et  turpitudo  sub  conspectu  solis  et  lunae  et  stellarum.  Postea  dicit,  Quae  dilexerunt  Non  dubium  est  quin  alludat  ad  caecum  illum  fervorem  quo  rapiuntur  idololatrae,  ubi  prosiliunt  ad  cultus  illicitos.  Est  enim  species  effraenis  ac  furiosae  libidinis,  quemadmodum  aliis  locis  visum  est.  Neque  enim  magis  insanit  scortator,  quum  appetit  mulierem,  quam  idololatrae,  ubi  Satan  illorum  oculos  perstrinxit,  et  mentes  eorum  fascinavit.  De  hoc  igitur  impuro  amore  nunc  loquitur  propheta:  et  interea  oblique  exprobrat  quod  alienati  fuerint  sine  causa  a  Deo,  qui  legitimus  erat  maritus.  Nihil  autem  minus  tolerabile,  quam  dum  homines  a  Deo  perfide  ita  deficiunt,  postquam  eos  sibi  coniunxit,  et  postquam  contraxit  sacrum  et  inviolabile  coniugium.  Postea  addit,  Quibus  servierunt  Hoc  adhuc  1