5:199  PSYCHOPANNYCHIA.  Hoc  etiam  acerrimum  telum  est  contra  eos,  quod  responsum  est  latroni  imploranti  misericordiam  (Luc.  23,  42  ss.).  Rogaverat  ille,  Memento  mei  Domine,  dum  veneris  in  regnum  tuum.  Audit,  Hodie  mecum  eris  in  paradiso.  Ille  se  affuturum  latroni  promittit,  qui  ubique  est.  Et  paradisum  promittit,  quia  satis  delitiarum  habet,  qui  Deo  fruitur.  Neque  illum  reiicit  in  longam  dierum  seriem,  sed  eo  ipso  die  vocat  ad  delitias  regni  sui.  Iactatur  istorum  cavillum,  quo  Christi  verbum  eludunt.  Unus,  inquiunt,  dies  sicut  mille  anni,  in  conspectu  eius  (2  Petr.  3,  8).  Sed  non  meminerunt  Deum  humanis  sensibus  se  accommodare,  quoties  hominibus  loquitur.  Neque  legunt  diem  [fol.  21J  unum  in  scripturis  positum,  pro  mille  annis.  Quis  ferat  hunc  interpretem,  qui  quum  audierit  ex  Deo,  aliquid  hodie  futurum,  cogitet  annorum  millia?  An  vero,  quum  Ninivitis  Ionas  denunciaret,  Adhuc  quadraginta  dies,  et  Ninive  subvertetur:  poterant  illi  exspectare  Dei  iudicium  secure,  donec  quadragies  mille  anni  effluerent?  Neque  hoc  sensu  dixit  Petrus  mille  annos  in  conspectu  Dei  sicut  diem  unum.  Sed  quum  pseudoprophetae  aliqui  dies  et  horas  supputarent,  ut  Deum  mendacii  arguerent,  qui  non  ad  primum  eorum  votum  promissa  solveret:  admonet  apud  Deum  esse  aeternitatem,  cui  mille  anni  vix  sunt  unum  momentum.  Quoniam  vero  sentiunt  se  teneri  adhuc  implicitos,  contendunt,  hodie,  in  scripturis  significare  tempus  novi  testamenti,  sicut  heri,  veteris.  Huc  torquent  quod  in  epistola  ad  Hebraeos  legitur:  Iesus  Christus  heri,  et  hodie,  ipse  in  saecula  (Hebr.  13,  8).  Hic  vero  toto  coelo  errant.  Nam  si  heri  tantum  fuit,  aliquando  coepit  esse  qui  non  erat  ante  initium  veteris  testamenti.  Ubi  erit  Iesus  ille  Deus  aeternus,  iuxta  humanitatem  etiam  primogenitus  omnis  creaturae,  et  agnus  ab  origine  mundi  occisus  (Coloss.  1,  15;  Apoc.  13,  3.  8)?  Deinde,  si  hodie  id  temporis  designat,  quod  intercedit  inter  diem  iudicii  et  Christi  humanitatem,  habemus  paradisum  obventurum  latroni  ante  eum  diem,  quo  surgere  animas  a  somno  suo  docent.  Atque  ita,  eorum  confessione,  extorquebitur,  impletam  promissionem  latroni  datam,  ante  iudicium:  quam,  nisi  post  iudicium,  implendam  negant.  Quod  si  verbum  illud  ad  tempus  trahunt,  quod  iudicium  sequitur:  cur  addit  autor  epistolae,  Et  in  saecula?  Atque,  ut  palpare  possint  suas  tenebras:  si  respiciebat  Christus  in  ea  promissione  tempus  iudicii,  non  debuit  dicere  hodie,  sed  futuro  saeculo.  Quemadmodum  Iesaias,  quum  vellet  significare  resurrectionis  mysterium,  vocavit  Christum,  patrem  futuri  saeculi  (Ies.  9,  6).  Quum  autem  heri  et  hodie  et  in  saecula  dixerit  apostolus,  pro  eo  quod  dicimus,  fuit,  est,  et  erit  (quae  tria  tempora  nobis  aeternitatem  designant)  quid  aliud  agunt  suis  argutiolis,  quam  sensum  apostoli  pervertunt?  Hanc  esse  proprietatem  primi  vocabuli,  ut  tempus