1:199  [CO  1.  199]  erit,  tandem  et  de  stuppis  incidet  dubitatio.  Secum  enim  volutabit:  an  [OS  227]  non  sine  mantilibus  coenare  possit,  an  non  sudariis  carere?  Si  cui  paulo  delicatior  cibus  illicitus  visus  fuerit,  demum  nec  cibarium  panem  ac  vulgaria  edulia  tranquillus  coram  Deo  comedet,  dum  in  mentem  veniet,  se  vilioribus  adhuc  cibis  posse  corpus  sustentare.  Si  in  suaviori  vino  haesitant,  deinde  nec  vappam  cum  bona  conscientiae  pace  bibet;  postremo  nec  dulciorem,  mundioremque  aliis  aquam  attingere  audebit.  Denique  eo  demum  veniet,  ut  super  transversam,  quod  dicitur,  festucam  incedere  nefas  ducat.  Non  enim  hic  leve  certamen  inchoatur,  sed  hoc  controvertitur:  an  his  aut  illis  nos  uti  Deus  velit,  cuius  voluntas  consiliis  nostris  ac  factis  omnibus  praeire  debet.  Hinc  alios  desperatione  in  confusionem  abripi  necesse  est,  alios  contempto  Deo  et  abiecto  eius  timore,  viam  sibi  ruina  facere,  quam  expeditam  non  habeant.  Quicunque  enim  tali  dubitatione  impliciti  sunt,  quoquo  se  vertant,  praesentem  ubique  conscientiae  offensionem  vident.  Scio,  inquit  Paulus  (Rom.  14),  quia  nihil  commune  est  (per  commune,  profanum  accipiens)  nisi  qui  existimat  aliquid  commune,  illi  commune  est.  Quibus  verbis  res [p. 408]  omnes  externas  libertati  nostrae  subiicit,  modo  eius  libertatis  ratio  animis  nostris  apud  Deum  constet.  Verum  si  qua  superstitiosa  opinio  scrupulum  nobis  iniiciat,  quae  suapte  natura  pura  erant,  nobis  contaminantur.  Quare  subiicit:  beatus  qui  non  iudicat  seipsum  in  eo  quod  probat.  At  qui  diiudicat,  si  ederit,  condemnatus  est,  quoniam  non  edit  ex  fide.  Porro  quod  non  est  ex  fide,  peccatum  est.  Inter  huiusmodi  angustias,  qui  omnia  secure  nihilominus  audendo  se  animosiores  ostendunt,  nonne  se  tantundem  a  Deo  avertunt?  Qui  vero  aliquo  Dei  timore  penitius  afficiuntur,  cum  et  ipsi  cogantur  multa  admittere  aversante  conscientia,  formidine  consternantur  ac  concidunt.  Omnes  quotquot  tales  sunt,  nihil  donorum  Dei  accipiunt  cum  gratiarum  actione,  qua  tamen  sola  nobis  omnia  in  usum  nostrum  sanctificari,  testatur  Paulus  (1  Tim.  4).  Intelligo  autem  gratiarum  actionem  ex  animo  profectam,  qui  Dei  beneficentiam  et  bonitatem  in  suis  donis  agnoscat.  Nam  multi  quidem  eorum,  Dei  bona  esse  intelligunt  quibus  utuntur  et  Deum  in  operibus  suis  laudant,  sed  cum  sibi  data  esse  persuasum  non  habeant,  quomodo  gratias  Deo  agerent  tanquam  datori?  Videmus  in  summa,  quorsum  haec  tendat  libertas:  nempe,  ut  Dei  donis,  nullo  conscientiae  scrupo,  nulla  animi  perturbatione  utamur,  in  quem  usum [p. 409]  nobis  a  Deo  data  sunt;  qua  fiducia  et  pacem  cum  eo  habeant  animae  nostrae  et  eius  erga  nos  largitatem  agnoscant.  Est  autem  diligenter  observandum,  christianam  [OS  228]  libertatem  omnibus  suis  partibus  rem  spiritualem  esse,  cuius  tota  vis  in  formidolosis  conscientiis  coram  Deo  pacificandis  posita