5:198  Sive  vivimus,  Domino  vivimus:  sive  morimur,  Domino  morimur:  sive  vivimus,  sive  morimur,  Domini  sumus.  In  hoc  enim  Christus  mortuus  est  et  resurrexit,  ut  vivis  dominetur  et  mortuis.  Quid  poterat  solidius  erigi  ad  fulciendam  fidem  nostram,  quam  dicere,  Christum  mortuis  dominari?  Non  enim  dominari  potest  nisi  his  qui  sunt:  quum  subiectos  esse  oporteat,  ubi  sit  imperium.  Ecce  etiam  testimonium  contra  eos  ferunt  in  coelo,  coram  Deo  et  angelis  eius,  animae  martyrum,  quae  clament  voce  magna  sub  altari:  Usquequo  Domine,  non  vindicas  sanguinem  nostrum  de  his  qui  habitant  in  terra  (Apoc.  6,  10)?  Et  datae  sunt  illis  stolae  albae,  et  dictum  est  illis  ut  requiescerent  adhuc  tempus  [fol.  20]  modicum,  donec  compleantur  conservi  eorum  et  fratres  eorum  qui  interficiendi  sunt  sicut  et  illi.  Clamant  mortuorum  animae,  dantur  illis  stolae  albae.  Quid  o  spiritus  dormitorii  vobis  sunt  stolae  albae?  pulvinaria  scilicet,  in  quibus  ad  somnum  decubent.  Videtis  iam  stolas  albas  somno  non  convenire.  Vigilent  oportet,  quae  sic  induuntur.  Quod  si  verum  est,  haud  dubie  stolae  albae  principium  gloriae  designant,  quod  divina  liberalitas  martyribus  impertit,  donec  exspectatur  dies  iudicii.  Non  enim  novum  est  in  scripturis  stolam  albam,  gloriam  et  festivitatem  figurare  et  gaudium.  Nam  in  veste  candida  Dominus  in  visione  conspectus  est  Danieli  (Dan.  7,  9).  Apparuit  hoc  habitu  Dominus  in  monte  Thabor  (Matth.  17,  2).  Apparet  angelus  Domini  ad  sepulcrum  mulieribus  in  veste  alba  (Matth.  28,  3).  Apparent  eadem  specie  angeli  discipulis  in  coelum  respicientibus,  post  Domini  ascensionem  (Act.  1,  10).  Eadem  fuit  species  angeli  apparentis  Cor??nelio  (Act.  10,  30).  Et  quum  filio,  qui  dissipata  substantia  ad  patrem  reversus  erat,  reddita  est  prima  stola,  symbolum  fuit  gaudii  et  festivitatis  (Luc.  15,  22).  Deinde,  si  clamabant  mortuorum  animae,  non  dormiebant.  Quando  igitur  isto  sopore  perfundi  coeperunt?  Neque  mihi  obtrudat  quispiam,  quod  sanguis  Abel  clamabat  ad  Deum.  Vulgaris  tropus  est,  fateor,  rem  ipsam  loqui:  sanguinis  effusionem,  vindictam  postulare.  Hoc  vero  in  loco,  affectum  martyrum  per  clamorem  nobis  repraesentari  certum  est,  quod  eorum  desiderium  sine  ulla  figura  exprimitur  et  petitio  describitur.  Usquequo  Domine  non  vindicas,  etc.  Quare  in  eodem  libro  Ioannes  duplicem  resurrectionem  prodidit,  quemadmodum  mortem  duplicem  (Apoc.  20,  5  ss.).  Nimirum  priorem  animae,  ante  iudicium:  alteram,  quum  corpus  suscitabitur,  et  quum  anima  quoque  suscitabitur  in  gloriam.  Beati,  inquit,  qui  habent  partem  in  resurrectione  prima:  in  his,  secunda  mors  non  habet  locum.  Itaque  vobis  horrendum  est,  qui  primam  illam  resurrectionem  agnoscere  non  vultis,  quae  tamen  unus  ingressus  est  ad  beatam  gloriam.  13*