15:198  si  modo  ad  verum  discendum  animos  adiicere  placuisset,  claro  documento  sunt  Aegyptii:  quorum  prae  foribus  quum  accensa  esset  verbi  Dei  lampas,  rerum  a  se  gestarum  (quindecim  scilicet  ante  conditum  mundum  annorum  millibus)  putidas  fabulas  nullo  pudore  iactarunt.  Nec  minus  puerile  insulsumque  Atheniensium  commentum,  qui  se  avTOx&ovac  gloriati,  quum  sibi  disiunctam  a  reliquo  genere  humano  originem  assererent,  barbaris  quoque  ipsis  se  fecerunt  ridiculos.  Quanquam  autem  omnes  plus  minus  eodem  ingratitudinis  crimine  fuerunt  impliciti,  eos  deligere  operae  pretium  putavi  quorum  eo  minus  excusabilis  est  error  quo  sibi  inter  alios  omnes  magis  sapere  visi  sunt.  Sive  autem  universae  quae  olim  fuerunt  gentes  velum  sibi  data  opera  obduxerint,  sive  illis  sua  tantum  ignavia  obstiterit,  incomparabilis  thesauri  loco  haberi  meretur  Mosis  liber,  qui  saltem  creationis  mundi  indubiam  nobis  fidem  facit,  qua  sublata  indigni  sumus  quos  terra  sustineat.  Historiam  diluvii,  quae  non  minus  formidabile  in  humano  genere  deleto  divinae  ultionis  quam  suave  gratiae  in  eodem  instaurato  speculum  continet,  in  praesentia  omittam.  Una  haec  utilitas  inaestimabile  libro  pretium  statuis  quod  res  apprime  cognitu  necessarias  solus  ostendit,  quomodo  post  exitialem  hominis  lapsum  ecclesiam  sibi  Deus  adoptaverit,  quisnam  fuerit  verus  eius.  cultus  et  quibus  pietatis  officiis  se  exercuerint  sancti  patres,  quomodo  pura  religio  hominum  ignavia  ad  tempus  collapsa  quasi  postliminio  in  statum  integrum  redierit,  quando  apud  certum  populum  deposuerit  Deus  gratuitum  aeternae  salutis  foedus,  quomodo  ex  uno  homine  et  sterili  et  caduco  propeque  semimortuo  et  (quemadmodum  Iesaias  vocat)  solitario  paulatim  fluxerit  exigua  soboles  quae  repente  in  multitudinem  ingentem  excrevit,  quam  inopinatis  modis  et  extulerit  et  tutatus  sit  electam  a  se  domum,  licet  inopem,  omnibus  praesidiis  nudatam  et  ad  quosvis  aestus  expositam  multiplices  hostium  copiae  undique  cingerent.  Porro  quam  necessaria  sit  harum  rerum  cognitio,  ex  suo  quisque  usu  et  experientia  iudicium  faciat.  Videmus  quam  tumultuose  papistae  fallaci  ecclesiae  titulo  simplices  territent.  A  Mose  depingitur  genuina  ecclesiae  facies,  quae  discussis  illis  praestigiis  inanem  metum  eximat.  Fucati  etiam  splendoris  pomparumque  ostentatione  in  stultam  sui  admirationem  rapiunt  minus  perspicaces,  imo  hebetant  ac  dementant.  At  si  ad  eas  notas  quibus  ecclesiam  designat  Moses  oculos  convertimus,  nihil  amplius  inanes  larvae  ad  fallendum  habebunt  momenti.  Saepe  nos  conturbat  fereque  exanimat  eorum  paucitas  qui  puram  Dei  doctrinam  sequuntur,  ae  praesertim  dum  cernimus  quam  longe  lateque  regnum  obtineant  superstitiones.  At  quemadmodum  olim  Dei  spiritus  per  os  Iesaiae  prophetae  Iudaeos