52:196  cum  multis  scripturae  locis,  ubi  spiritus  diem  illum  instare  pronuntiat.  Sed  facilis  est  solutio:  instat  enim  Dei  respectu,  apud  quem  mille  anni  sunt  tanquam  dies  unus.  Interea  sic  vult  Dominus  a  nobis  assidue  exspectari,  ut  certum  spatium  minime  praefiniamus.  Vigilate,  inquit:  quia  nescitis  diem  neque  horam.  Falsi  autem  isti  vates  quos  Paulus  refellit,  quum  suspensos  tenere  deberent  hominum  animos,  ne  morae  taedio  fatigarentur,  iubebant  de  brevi  adventu  securos  esse.  3.  Ne  quis  vos  decipiat  ullo  modo:  quia  nisi  prius  venerit  discessio,  et  nisi  revelatus  fuerit  sceleratus  ille,  filius  perditus,  4.  adversarius,  et  qui  se  extollit  adversus  omne  quod  dicitur  Deus  aut  numen:  ita  ut  ipse  in  templo  Dei  tanquam  Deus  sedeat^  ostendens  se  ipsum  quasi  sit  Deus.  3.  Ne  quis  vos.  Ne  sibi  laetum  redemptionis  diem  frustra  tam  brevi  promittant,  triste  illis  vaticinium  proponit  de  futura  ecclesiae  dissipatione.  Eadem  prorsus  haec  concio  est  cum  illa  Christi  qua  usus  est  (Matth.  24,  6)  apud  discipulos,  quum  rogassent  de  fine  saeculi.  Hortatur  enim  ut  se  ad  dura  certamina  comparent.  Et  postquam  de  maximis  et  prius  inauditis  calamitatibus  disseruit,  quibus  prope  in  vastitatem  redigenda  erat  terra,  subiicit,  nondum  esse  finem:  sed  haec  initia  esse  dolorum.  In  hunc  modum  Paulus  diu  militandum  fidelibus  esse  pronuntiat,  antequam  ad  triumphum  veniant.  Est  autem  hic  insignis  locus,  et  apprime  dignus  observatu.  Fuit  haec  gravis  et  periculosa  tentatio,  quae  vel  maxime  cordatos  posset  concutere  ac  deiicere  e  statu:  videre  ecclesiam,  quae  tantis  laboribus  sensim  ac  difficulter  erecta  fuerat,  mediocrem  in  statum  subito  quasi  tempestate  convulsam  ruere.  Praemunit  ergo  Paulus  non  Thessalonicensium  modo,  sed  piorum  omnium  mentes:  ut  quum  ecclesiam  dissipari  contigerit,  non  terreantur  quasi  re  nova,  vel  non  exspectata.  Sed  quia  hunc  locum  varie  torserunt  interpretes,  hoc  primo  agendum  est,  ut  teneamus  genuinam  Pauli  mentem.  Negat  venturum  Christi  diem,  donec  in  apostasiam  prolapsus  fuerit  mundus,  ac  regnum  Antichristi  in  ecclesia  obtinuerit:  nam  quod  de  imperii  Romani  defectione  locum  hunc  exposuerunt,  magis  frivolum  est,  quam  ut  longa  refutatione  opus  habeat.  Ac  miror  tam  multos  scriptores,  doctos  alioqui  et  acutos,  in  re  tam  facili  hallucinatos  esse:  nisi  quod,  quum  errasset  unus,  turmatim  alii  sine  iudicio  sequuti  sunt.  Apostasiam  ergo  vocat  Paulus  perfidam  a  Deo  defectionem:  nec  eam  unius  hominis  vel  paucorum,  sed  quae  longe  lateque  in  maiore  hominum  multitudine  grassetur.  Nam  quum  apostasia  sine  adiectione  nominatur,  non  potest  restringi  ad  paucos.  Iam  non  alii  possunt  intelligi  apostatae,  quam  qui  prius  nomen