5:196  tum  si  quidem  nostrum  Christus  est,  et  armatura  illa,  qua  nos  induit  apostolus  (Ephes.  6,  11  ss.).  Et  scriptum  est  (Psal.  45,  12),  quod  rex  concupiscet  decorem  coniugis  suae,  quae  fortis  erit  in  muneribus,  cuius  omnis  gloria  intrinsecus.  Denique  signavit  suos  Dominus,  quos  et  in  morte,  et  in  resurrectione  agniturus  est  (Apoc.  7,  3).  Cur  non  potius  respiciunt  ad  id  quod  [fol.  18]  proxime  dixerat,  et  cui  hanc  ipsam  sententiam  connectit?  Licet  is  qui  foris  est  homo  noster  corrumpatur,  eum  tamen,  qui  intus  est,  renovari  de  die  in  diem  (2  Cor.  4,  16).  Quod  autem  apostolus  clausulam  illam  subdidit,  de  manifestatione  coram  tribunali  Christi,  magis  eos  stringit:  quum  prius  dixisset  nos  et  domi  et  peregre  agentes  contendere  ut  illi  placeamus.  Quum  per  domum,  corpus  intelligat,  quid  est  illud  peregre?  Ut  ergo  nihil  addamus,  verba  sine  interprete  hoc  loquuntur:  nos,  et  in  corpore,  et  extra  corpus,  contendere  ut  placeamus  Domino:  deinde,  nos  sensuros  Dei  praesentiam,  quum  ab  hoc  corpore  separabimur.  Iam  non  per  fidem  ambulaturos,  sed  per  speciem:  quoniam  hoc  terrae  pondus,  quo  premimur,  nos  a  Deo,  quasi  maceries,  longo  intervallo  separat.  Isti  nugatores  contra,  nos  per  mortem  longius  a  Deo  discessuros  garriunt,  quam  dum  sumus  in  hac  vita.  De  quibus  enim  scriptum  est:  Domine,  in  lumine  vultus  tui  ambulabunt  (Psal.  89,  16);  item:  Ipse  spiritus  testimonium  reddit  spiritui  nostro,  quod  filii  Dei  sumus  (Rom.  8,  16),  et  multa  eius  generis  :  his  et  lumen  vultus  Dei,  et  spiritus  testimonium  adimunt.  Quod  si  verum  est,  feliciores  nunc  sumus,  quam  post  mortem.  Etsi  enim  sub  elementis  huius  mundi  vivimus,  habemus  tamen  habitationem  et  politiam  in  coelis,  ut  ait  Paulus  (Phil.  3,  20).  Ubi  autem  veternus  ille,  et  rerum  omnium  oblivio  animas  a  morte  exceperit,  perdunt  quamcunque  habent  suavitatem  gustus  spiritualis.  Melius  nos  docent  sacrae  literae.  Corpus,  quod  corrumpitur,  aggravat  animam,  et  terrena  habitatio  deprimit  sensum  multa  cogitantem  (Sap.  9,  15).  Si  corpus  animae  est  carcer,  si  terrena  habitatio,  compedes  sunt:  quid  anima  soluta  hoc  carcere,  exuta  his  vinculis?  nonne  sibi  redditur,  et  quasi  se  colligit?  Ut  dicere  liceat,  tantum  illi  accrescere,  quantum  decrescit  corpori.  Velint  nolint,  hoc  semper  in  confesso  est.  Ubi  molem  hanc  corporis  abiicimus,  cessare  pugnam  illam  spiritus  adversus  carnem,  et  carnis  adversus  spiritum.  Denique  mortificationem  carnis,  esse  vivificationem  spiritus.  Tum  igitur  anima,  excussis  sordibus,  vere  est  spiritualis,  ut  consentiat  voluntati  Dei,  nec  sentiat  carnis  tyrannidem  sibi  repugnantem:  ut  in  hac  tranquillitate  resideat,  nihil  aliud  quam  Deum  cogitans.  Et  tunc  scilicet  dormit,  quum  elevare  se,  nullo  pondere  aggravante,  potest?  Tunc  stertit,  quum  multa  percipere  sensu  et  cogitatione  potest,  nullo  impedimento  interpellante?