29:196  qu'il  nous  garde,  que  nostre  salut  est  bien  asseure?  Si  nous  n'avons  cela,  nous  sommes  miserables  en  toute  nostre  vie.  Or  cependant  nous  avons  a  noter,  quand  le  S.  Esprit  travaille  tant  a  nous  persuader  que  c'est  de  Dieu,  et  que  sa  force  est  infinie:  que  c'est  d'autant  que  nous  sommes  tousiours  en  doute  et  en  bransle,  qu'il  n'y  a  nulle  fermete  en  nous:  et  encores  que  nous  ayons  entendu  que  Dieu  gouverne  tout,  que  son  empire  est  souverain,  qu'on  nous  en  ait  asseure,  que  cela  nous  ait  este  reitere  plusieurs  fois  :  nous  ne  laissons  pas  d'avoir  tousiours  des  phantasies  qui  nous  obscurcissent  nos  esprits,  nous  entrons  en  des  speculations  ie  ne  say  quelles,  et  puis  nous  sommes  agitez  de  beaucoup  de  troubles  qui  nous  viennent:  et  estans  ainsi  saisis  de  nos  vaines  phantasies,  nous  ne  savons  que  c'est  de  nous  fier  en  Dieu,  et  nous  appuyer  sur  sa  vertu  :  cognoissons  (di-ie)  qu'en  ce  passage  le  S.  Esprit  nous  a  voulu  admonester  de  la  bestise  qui  est  en  nous,  afin  de  nous  esveiller,  et  que  nous  apprenions  de  magnifier  mieux  que  nous  n'avons  point  fait  la  gloire  de  nostre  Dieu,  voire  cognoissans  que  tout  ce  qui  a  accoustume  de  nous  espouvanter,  n'est  rien  au  prix  de  luy:  d'autant  qu'il  se  pourra  assubiettir  et  Satan,  et  le  monde,  et  ce  qui  est  contraire  a��  nostre  salut:  il  faudra  mesmes  que  tout  cela  s'adonne  a  son  service  quand  il  voudra.  Mais  notons  aussi  bien  le  mot  qui  est  ici  mis,  que  Dieu  chevauche  les  cieux  en  nostre  aide.  S'il  estoit  seulement  fait  mention  de  la  maieste  de  Dieu,  et  qu'il  fust  exalte  par  dessus  tout,  desia  nous  aurions  quelque  matiere  de  nous  appuyer  sur  luy:  mais  encores  nous  pourrions  nous  enquerir  s'il  aura  pitie  de  nous,  s'il  repoussera  ce  qui  nous  est  contraire,  d'autant  que  nous  ne  sommes  pas  dignes  qu'il  desploye  sa  vertu  pour  nous:  mais  notamment  ici  Moyse  prononce,  que  ce  que  Dieu  a  de  grandeur  et  de  vertu,  il  veut  l'appliquer  a  cest  usage,  que  nous  soyons  maintenus  et  garentis.  Quand  donc  nous  oyons  que  Dieu  veut  estre  tout  puissant,  afin  de  nous  aider,  afin  de  prevoir  a  toutes  nos  necessitez  :  voila  ou  nous  pouvons  prendre  une  certaine  resolution  et  infallible.  Il  n'y  a  donc  rien  ici  d'omis  ni  d'oublie,  quand  d'un  coste  Moyse  abbat  tout  ce  qui  semble  estre  haut,  et  monstre  que  Dieu  a  tout  sous  ses  pieds,  et  qu'il  en  pourra  bien  chevir:  et  cependant  monstre  que  Dieu  nous  veut  estre  propice,  qu'il  nous  aidera,  et  qu'il  sera  tousiours  prest  a  nous  secourir.  Ainsi  donc  quand  nous  apprehenderons  Dieu  en  sa  haute  maieste,  combien  qu'il  semble  estre  eslongne  de  nous,  que  nous  soyons  povres  vers  rempans  sur  la  terre,  et  qu'il  surmonte  tout  ce  que  nous  pouvons  voir,  quelque  excellence  qu'il  y  ait:  que  nous  sachions  neantmoins  qu'il  daigne  bien  nous  secourir,  et  qu'il  veut  que  ceste  puissance-la  soit  coniointe  d'un  lien  inseparable  a,