55:195  195  EPIST.  AD  HEBRAEOS  196  Proinde  ut  hoc  testimonio  iuvetur  papa  cum  suis,  necesse  prius  habebunt  omnes,  probare  se  ex  eorum  esse  numero  qui  pro  salute  nostra  vigilant.  Hoc  si  constet:  nihil  iam  erit  controversiae  quin  reverenter  ab  omnibus  piis  colantur.  Ipsi  enim  vigilant  Quo  plus  oneris  sustinent,  eo  maiori  honore  dignos  significat.  Nam  quo  quisque  plus  laboris  suscipit  nostra  causa,  et  quo  maiori  difficultate  vel  periculo  se  nobis  impendit,  eo  sumus  illi  magis  obstricti.  Talis  autem  episcoporum  est  functio,  ut  summas  in  se  molestias,  praeter  summum  periculum,  comprehendat.  Vix  ergo,  si  grati  esse  volumus,  licebit  quantum  illis  debetur,  rependere.  Praecipue  vero  quum1)  rationem  de  nobis  reddituri  sint  Deo,  indignum  esset  nullam  apud  nos  haberi  eorum  rationem.  Admonet  praeterea,  quanta  in  re  nobis  eorum  opera  prosit.  Nam  si  pretiosa  nobis  est  animarum  nostrarum  salus,  minime  viles  erunt  qui  pro  illa  excubant.  Ideo  autem  nos  dociles  esse  iubet  promptosque  ad  obsequendum,  ut  quod  pro  officii  necessitate  faciunt  pastores,  libenter  quoque  et  alacri  animo  faciant.  Nam  si  restrictum  moestitia  vel  taedio  animum  habeant,  ut  alias  probi  sint  ac  fidi,  reddentur  tamen  pigriores:  quia  una  cum  hilaritate  concidet  in  agendo  vigor.  Ideo  inutile  fore  plebi  denuntiat  apostolus,  si  ingratitudine  sua  pastoribus  dolorem  ac  gemitum  afferat:  ut  significet  nos  sine  propriae  salutis  iactura,  non  fore  pastoribus  molestos  vel  immorigeros.  Quum  vix  decimus  quisque  hoc  cogitet,  hinc  apparet  quantus  vulgo  sit  salutis  neglectus.  Nec  mirum  est  si  tam  pauci  hodie  reperiantur  qui  strenue  pro  ecclesia  Dei  vigilent.  Praeterquam  enim  quod  paucissimi  sunt  similes  Paulo,  qui  os  apertum  habeant  clausis  populi  auribus,  et  constricto  populi  corde,  suum  ipsi  dilatent:  Dominus  etiam  ingratitudinem  vindicat  quae  ubique  fere  invaluit.  Quare  meminerimus  de  nostra  pervicacia  poenas  sumi,  quoties  frigent  in  officio  pastores,  vel  minus  sunt  seduli  quam  expediret.  18.  Confidimus  enim.  Postquam  se  eorum  precibus  commendavit,  ut  eos  ad  precandum  incitet,  praedicat  se  bonam  habere  conscientiam.  Quamvis  enim  totum  mundum  complecti  debeant  preces  nostrae,  sicuti  caritas  ex  qua  manant:  peculiariter  tamen  nos  de  piis  et  sanctis  hominibus  convenit  esse  sollicitos,  quorum  nobis  comperta  est  probitas,  aut  aliae  virtutis  notae.  In  hunc  ergo  finem  conscientiae  suae  integritatem  commemorat,  ut  eos  magis  commoveat  ad  suscipiendam  sui  curam.  Quum  dicit:  Persuasus  sum,  vel  confido,  partim  hoc  modestiae  servit,  partim  fiduciae.  Particula  in  omnibus,  tam  ad  res  quam  ad  homines  referri  potest:  itaque  in  medio  relinquo.  Aliud  argumentum  addit,  ergo.