52:195  195  EPIST.  PAULI  AD  THESSALONICENSES  II.  196  postea  non  sine  Satanae  artificio  sparsa  fuerunt.  Nam  ubi  dies  aliquis  propinquus  esse  dicitur,  nisi  statim  adveniat,  ut  impatiens  est  longioris  morae  hominum  natura,  languescunt  animi,  et  languorem  paulo  post  sequitur  desperatio.  Hic  ergo  Satanae  astus  fuit,  quia  spem  resurrectionis  palam  evertere  non  poterat,  ut  eam  furtim  quasi  per  cuniculos  labefactaret,  diem  eius  propinquum  et  mox  futurum  promittere*  Et  postea  non  desiit  varia  machinari,  quibus  resurrectionis  fidem  paulatim  ex  hominum  animis  deleret:  quia  aperte  evellere  non  poterat.  Est  quidem  hoc  speciosum,  diem  nostrae  redemptionis  praefigi,  ideoque  vulgi  plausu  excipitur:  sicuti  videmus  Lactantii  et  Chiliastarum  deliria  multum  olim  placuisse.  Atqui  non  alio  tendebant,  quam  ad  diruendam  spem  resurrectionis.  Non  fuit  hoc  Lactantii  consilium,  sed  abusus  est  pro  sua  vafritie  Satan  eius  et  similium  curiositate,  ut  nihil  in  religione  certum  aut  fixum  relinqueret.  Et  hodie  quoque  eundem  movere  lapidem  non  cessat.  Nunc  videmus  quam  necessaria  fuerit  Pauli  admonitio:  quoniam  alioqui  specioso  praetextu  subversa  fuisset  tota  religio  apud  Thessalonicenses.  2.  Ne  cito  dimoveamini  a  mente  neque  turbemini.  Mentem  vocat  compositam  fidem  quae  in  sana  doctrina  acquiescit.  Illo  autem  figmento,  quod  repudiat,  quasi  in  ecstasin  rapti  fuissent.  Et  tres  imposturae  species  notat,  a  quibus  cavere  debeant:  spiritum,  sermonem,  et  supposititiam  epistolam.  Spiritus  nomine  fictas  prophetias  intelligit:  ac  modum  illum  loquendi  inter  pios  tritum  fuisse  apparet,  ut  vaticiniis  imponerent  nomen  spiritus,  honoris  causa.  Nam  ut  iustam  habeant  autoritatem  prophetiae,  in  spiritum  Dei  potius  quam  in  homines  respicere  convenit.  Verum  ut  mos  diaboli  est  se  transfigurare  in  angelum  lucis,  hunc  titulum  furati  sunt  impostores,  ut  fucum  simplicibus  facerent.  Quam  quam  autem  hanc  larvam  Paulus  illis  detrahere  poterat,  tamen  per  concessionem  sic  loqui  maluit.  Ac  si  diceret:  Utcunque  spiritum  revelationis  obtendant,  ne  credite.  Quemadmodum  et  Iohannes  (1.  Ep.  4,  1),  Probate,  inquit,  spiritus  numquid  ex  Deo  sint.  Sermo  doctrinam  quamlibet  (meo  iudicio)  comprehendit:  dum  rationibus,  vel  coniecturis,  vel  aliis  coloribus  insistunt  falsi  doctores,  ut  sua  commenta  persuadeant.  Quod  addit  de  epistola,  testimonio  est,  veterem  fuisse,  hanc  impudentiam,  aliena  nomina  supponendi.  Quo  magis  admiranda  est  Dei  erga  nos  misericordia,  quod,  quum  vivo  adhuc  et  vidente  Paulo  falso  eius  nomen  in  scriptis  adulterinis  praetenderent,  integra  eius  scripta  ad  nostram  usque  aetatem  servata  sunt.  Certe  neque  fortuito,  neque  hominum  industria  fieri  hoc  poterat:  nisi  Deus  ipse  virtute  sua  Satanam  et  omnes  eius  ministros  compescuisset.  Quasi  instet  dies  Christi.  Videtur  hoc  pugnare