6:194  ment  afin  que  chascun  se  prepare  et  dispose  a  la  recevoir  dignement,  et  en  telle  reverence,  qu'il  appartient  Laquelle  aussi  requiert  la  confession  de  bouche  et  que  en  nostre  vie  il  n'y  ayt  rien  contraire  a  icelle.  Les  Ministres  donques  font  sainctement,  et  ce  qui  est  digne,  tant  de  leur  ministere,  que  de  la  dignite  d'iceluy,  lesquelz  ne  recoivent  personne  aux  Sacrementz  sinon  que  premierement  ilz  soient  eprouvez  et  instruitz.  Au  surplus  (pour  autant  que  ceste  viande  et  ce  bruvage  de  vie  eternelle  ne  doivent  point  estre  administrez  sinon  a  ceux  qui  grandement  le  desirent)  il  s'ensuit  que  le  peuple  auquel^  on  doit  administrer  la  Cene  doit  estre  en  icelle  admonneste  en  toutes  sortes,  de  congnoistre  soymesme  et  combien  pour  sa  faute  il  est  a  Dieu  redevable,  et  sentir  combien  il  luy  est  necessaire  de  participer  a  la  communication  de  Christ  et  quelz  biens  luy  sont  offertz  en  icelle.  Pour  ceste  cause  nous  commenceons  tresbien  le  ministere  de  la  Cene  par  la  confession  de  noz  pechez,  et  y  adioustons  les  lecons  de  la  Loy,  et  de  L'evangile  avecques  Pseaumes,  afin  que  par  la  confession  de  noz  pechez  et  l'explication  de  la  Loy  divine  (laquelle  ordonne  peines  presentes  et  eternelles  aux  pecheurs  et  donne  seullement  aux  bons  les  biens  tant  presens  que  futurs)  nous  soyons  attirez  en  plus  grande  congnoissance  et  sentiment  d'iceux:  et  aussi  que  par  iceux  nous  avons  deservy  la  damnation  eternelle.  Car  quand  nous  considerons  combien  toute  nostre  vie  est  contraire  a  la  Loy  de  Dieu,  et  non  point  seullement  aucunes  de  noz  oeuvres,  et  que  le  peche  a  encore  si  grand  domination  en  nostre  chair,  que  nous  ne  faisons  pas  le  bien  lequel  nous  voulons,  mais  le  mal  que  nous  hayssons,  en  cela  nous  congnoissons  combien  nous  est  necessaire  la  communication  du  corps  et  du  sang  du  Seigneur:  Veu  qu'en  nostre  chair  et  nostre  sang  il  n'y  a  aucun  bien,  pourquoy  ne  peuvent  pour  ceste  cause  posseder  le  Royaume  de  Dieu.  Il  est  donq  convenable  que  en  la  sacree  Cene,  outre  la  confession  des  pechez,  on  prie  pour  avoir  pardon  d'iceux,  on  lise  et  explicque  la  Loy  divine,  on  chante  Pseaumes  magnifiant  la  Maieste  de  Dieu,  explicquant  la  Loy  et  demandant  a  Dieu  pardon.  Or  pource  que  par  la  predication  de  L'evangile,  nous  congnoissons  que  Iesus  Christ  nostre  Seigneur  vray  Dieu  et  vray  homme  a  en  la  croix  satisfait  a  Dieu  son  Pere  pour  noz  pechez,  par  l'oblation  de  son  corps  et  de  son  sang  :  et  par  la  communication  d'iceux  il  luy  plaist  nous  donner,  que  nous  vivions  en  luy,  et  luy  en  nous:  aussi  par  cela  nous  congnoissons  quelz  excellens  biens  nous  y  sont  offers  et  communiquez.  Premierement  nous  summes  asseurez  de  la  remission  de  noz  pechez,  et  summes  certains  de  la  grace  du  Pere  lequel  nous  a  adoptez  pour  ses  enfans  et  heritiers  par  son  Filz  Iesus  Christ,  nous  pardonnant  toute  nostre  iniquite,  tant  celle  13