51:193  193  CAPUT  IV.  194  et  nostra  omnia  colligere,  quemadmodum  videbimus.  8.  Propterea  dicit.  Quia  nonnihil  a  genuino  sensu  hoc  testimonium  detorsit  Paulus  ut  proposito  suo  accommodaret:  impii  eum  criminantur,  quasi  scriptura  abusus  fuerit.  Quin  etiam  Iudaei,  quo  plus  habeant  coloris  ad  maledicendum,  naturalem  ipsum  sensum  calumniose  depravant:  quod  de  Deo  praedicatur,  ad  Davidem  vel  ad  populum  transferendo.  David,  inquiunt,  vel  populus,  in  altum  adscendit,quum,  tot  victoriis  elatus,  factus  est  hostibus  suis  superior.  Atqui  si  quis  totum  psalmi  contextum  expendat,  reperiet  soli  Deo  proprie  hoc  tribui.  Totus  psalmus  quasi  epinicion  est,  quod  David  ob  victorias  sibi  concessas  canit  Deo:  verum  ex  rebus  per  manum  suam  gestis  occasione  sumpta,  quae  Deus  alias  magnifice  ediderat  pro  salute  populi  sui,  obiter  commemorat.  Scopus  est,  ut  gloriosam  Dei  potentiam  et  bonitatem  in  ecclesia  spectandam  proponat.  Inter  alia  dicit,  Adscendisti  in  altum.  Caro  enim  Deum  iacere  et  dormire  putat,  nisi  quum  palam  exercet  sua  iudicia.  Itaque  hominum  iudicio,  quum  oppressa  est  ecclesia-,  Deus  quodammodo  est  humiliatus.  Ubi  autem  eius  liberandae  causa  manum  ultricem  exserit,  videtur  se  erigere  et  suum  tribunal  conscendere.  Loquutio  est  satis  frequens  et  nota:  denique  liberatio  ecclesiae  hic  vocatur  Dei  exaltatio.  Paulus  vero  quum  videret  a  Davide  celebrari  triumphum  de  omnibus  Dei  victoriis,  quascunque  in  ecclesiae  suae  salutem  retulerat,  merito  hunc  versum  de  adscensione  Dei  accommodavit  ad  Christi  personam.  Hic  enim  praecipuus  est  triumphus  quem  Deus  unquam  egit,  quum  Christus  devicto  peccato,  subacta  morte,  Satana  profligato,  in  coelum  magnifice  sublatus  est,  ut  glorioso  imperio  ecclesiam  regeret.  Hactenus  non  est  cur  obiiciat  quisquam,  Paulum  hoc  testimonio  abusum  esse  praeter  mentem  Davidis.  Nam  quum  David  in  perpetuo  ecclesiae  statu  Dei  gloriam  consideret:  nulla  certe  reperietur  magis  triumphalis  et  memoranda  Dei  adscensio  quam  qua  sublatus  est  Christus  ad  patris  dexteram,  ut  sibi  omnes  principatus  et  dominationes  subiiceret,  atque  ita  fieret  aeternus  ecclesiae  suae  vindex  et  custos.  Captivam  duxit  Captivitas  hic  nomen  est  collectivum,  pro  hostibus  captivis.  Significat  ergo  simpliciter,  quod  Deus  in  suam  potestatem  hostes  redegerit:  quod  plenius  in  Christo  impletum  est  quam  alias  unquam.  Neque  enim  Satanam  modo  et  peccatum  et  mortem  totosque  inferos  prostravit:  sed  ex  rebellibus  quotidie  facit  sibi  obsequentem  populum,  quum  verbo  suo  carnis  nostrae  lasciviam  domat:  rursus  hostes  suos,  hoc  est,  impios  omnes,  quasi  ferreis  catenis  tenet  constrictos,  dum  illorum  furorem  cohibet  sua  virtute,  ne  plus  valeant  quam  illis  concedit.  Verum  quod  proxime  sequitur,  plus  Calvini  opera.  Vol.  LL