50:192  Atque  hinc  colligere  promptum  est  quam  ineptum  fuerit  commentum  Hieronymi  et  Chrysostomi,  qui  putarunt  ex  composito  apostolos  hanc  fabulam  coram  populo  egisse.  Neque  illis  suffragatur  particula  xaxa  TcpoaooTCov,  quae  significat  Petrum  in  os,  (ut  aiunt)  vel  praesentem  castigatum  obmutuisse.  Quod  putat  Chrysostomus,  eos  vitandi  scandali  causa  colloquuturos  fuisse  privatim,  si  quid  habuissent  dissensionis,  leve  est:  alia  enim  minora  scandala  huic  perniciosissimo  posthabenda  erant,  quod  ecclesia  scinderetur,  quod  periclitabatur  christiana  libertas,  quod  obruebatur  Christi  gratia.  Palam  igitur  oportuit  publicum  hoc  peccatum  corrigi.  Praecipuum  argumentum,  quo  nititur  Hieronymus,  nimis  frivolum  est.  Cur  damnasset,  inquit,  in  altero  Paulus  quod  sibi  laudi  ducit?  Nam  gloriatur  se  Iudaeis  factum  esse  Iudaeum.  Respondeo,  longe  aliud  Petrum  fecisse.  Neque  enim  aliter  se  accommodabat  Iudaeis  Paulus,  quam  salva  libertatis  doctrina.  Unde  nec  Titum  circumcidere  voluit,  ut  salva  maneret  evangelii  veritas.  Petrus  vero  ita  iudaizabat,  ut  gentes  cogeret  in  servitutem:  et  simul  hoc  quasi  praeiudicio  derogaret  Pauli  doctrinae.  Non  tenuit  ergo  modum  :  quia  gratificandi  maiorem  curam  quam  aedificandi  habuit,  magisque  respexit  quid  Iudaeis  placeret  quam  quid  universo  corpori  expediret.  Rectius  itaque  iudicavit  Augustinus,  qui  negat  ex  compacto  quidquam  actum  fuisse:  sed  Paulum  sincere  pro  christiano  zelo  se  opposuisse  pravae  et  intempestivae  simulationi  Petri,  quod  eam  ecclesiae  noxiam  iudicaret.  12.  Nam  antequam  venissent  quidam.  Status  causae  hic  describitur,  quod  Petrus  in  gratiam  Iudaeorum  discessionem  fecerat'  a  gentibus,  ita  ut  ab  ecclesiae  communione  eas  arceret,  nisi  abdicata  evangelii  libertate  legis  iugum  subirent.  Hic  si  tacuisset  Paulus,  concidebat  tota  eius  doctrina,  ruebat  tota  aedificatio  ministerio  eius  comparata.  Ergo  et  animose  insurgere,  et  acriter  pugnare  necesse  habuit.  Hic  videmus  quam  caute  temperanda  sint  nostra  erga  homines  obsequia:  ne  immodico  placendi  studio,  aut  praepostero  offensionis  metu  a  recto  cursu  deflectamus.  Id  si  potuit  Petro  accidere,  quanto  facilius  nobis  accidet,  nisi  sedulo  caveamus?  14.  Ubi  vidissem  quod  non  recto  pede.  Quidam  exponunt  de  gentilibus,  qui  turbati  Petri  exemplo  iam  labascebant:  sed  magis  convenit  de  Petro  et  Barnaba  eorumque  asseclis  intelligere.  Rectus  ad  evangelii  veritatem  incessus  erat,  unire  gentes  Iudaeis  salva  vera  doctrina.  Necessitate  vero  servandae  legis  obstringi  piorum  conscientias  et  silentio  sepeliri  libertatis  doctrinam:  haec  erat  indigna  merces  unitatis.  Veritatem  evangelii  hic  Paulus  eodem  sensu  accipit  quo  prius:  cui  fucum  illum  opponit,  quo  evangelium  deformabant  Petrus