27:190  voyons  la  foiblesse  qui  est  en  nous,  II  est  vray  que  quand  nous  aurons  commence  un  mauvais  train,  nous  n'y  serons  que  par  trop  endurcis:  mais  a  bien  faire  nous  n'y  sommes  gueres  constans.  Encores  donc  que  nous  ayons  quelque  bonne  affection,  et  desir  de  servir  Dieu  :  si  faut-il  que  de  iour  en  iour  il  nous  solicite.  Cerchons  donc  les  moyens,  c'est  que  nous  frequentions  la  doctrine  par  laquelle  nous  devons  estre  conduits,  et  que  nous  oyons  volontiers  les  admonitions  qu'on  nous  fera  pour  nous  attirer  a  Dieu,  et  pour  nous  confermer  en  sa  crainte,  et  en  son  obeissance.  Et  mesmes  quand  nous  aurons  este  au  sermon,  que  nous  aurons  ouy  la  parolle  qui  nous  est  annoncee  au  nom  de  Dieu,  que  cela  soit  pour  nous  retenir:  encores  que  nous  fussions  tentez  de  nous  desbaucher,  que  ce  soit  comme  une  bride  par  laquelle  Dieu  nous  retienne  a  soy.  Voila  comme  nous  devons  user  des  moyens  et  remedes  que  Dieu  nous  assigne,  pour  corriger  la  fragilite  qui  est  en  nous:  car  autrement  nous  declinerons  bien  tost,  et  serons  esbahis  que  nous  serons  du  tout  esgarez  de  nostre  Dieu.  Voila  en  somme  ce  que  nous  avons  a  retenir  de  ceste  premiere  sentence  qui  est  ici  contenue.  Or  il  adiouste  puis  apres  (ce  que  nous  avons  aussi  bien  veu)  que  le  peuple  ne  sacrifie  point  en  tous  lieux,  mais  au  lieu  que  Dieu  choisira  d'entre  tes  lignees.  Et  ceci  est  pour  retenir  le  peuple  en  obeissance,  afin  qu'il  n'attend  point  de  servir  Dieu  a  sa  poste,  ni  a  sa  phantasie.  Il  est  vray  que  de  prime  face  on  pourroit  dire,  qu'il  n'estoit  pas  besoin  de  reiterer  ce  qui  est  assez  facile  de  soy.  Mais  il  n'est  point  question  seulement  de  l'intelligence,  il  y  a  une  autre  raison  pour  laquelle  Dieu  a  tant  de  fois  mis  ceste  sentence  :  c'est  que  les  hommes  ne  se  peuvent  tenir  de  decliner  ou  ca  ou  la,  et  encores  qu'ils  ayent  propose  pour  quelque  temps  de  se  ranger  a  Dieu,  il  ne  faut  que  tourner  la  main  que  les  voila  esgarez,  pource  qu'ils  sont  vollages  et  legers.  Dieu  donc  non  sans  cause  met  ici  ce  que  desia  nous  avons  veu  auparavant,  que  le  peuple  ne  sacrifiera  point  en  chacun  lieu.  Et  pourquoy?  Car  les  choses  de  ce  temps-la  estoyent  encores  obscures,  et  il  estoit  besoin  que  le  peuple  fust  retenu  pour  cognoistre  qu'il  n'y  avoit  qu'un  seul  Dieu:  les  Payens  avoyent  chacun  leur  religion,  et  n'y  avoit  rien  de  certain  entre  eux.  Or  il  falloit  que  le  peuple  d'Israel  eust  cela  tout  resolu:  Le  Dieu  que  nous  adorons  est  createur  du  ciel  et  de  la  terre:  et  pource  que  nous  ne  pouvons  point  parvenir  iusques  a  luy,  il  s'est  declaire  a  nos  peres,  tellement  que  nous  ne  pouvons  faillir  en  l'adorant  selon  sa  Loy.  Il  falloit  que  le  peuple  eust  cela.  Car  s'il  y  eust  eu  divers  autels,  et  qu'un  chacun  se  fust  gouverne  a  sa  devotion,  qu'eust-ce  este?  Inventions:  on  eust  introduit  des  religions  diverses,  et  chacun  eust  imagine  ce  qu'il  eust  voulu,  on  n'eust  plus  adore  le  Dieu  d'Abraham