37:19  19  IN  ISAIAM  20  omnia  creavit.  Iniuriam  ergo  fieri  Deo  summam,  non  tantum  si  eius  maiestas  cum  rebus  nihili  conferatur,  sed  etiam  nisi  supra  omnes  angelos,  et  quidquid  censetur  divinum  longe  emineat.  Quum  Paulus  utitur  hoc  testimonio  adversus  idololatras,  aut  saltem  verba  prophetae  recitat  (Act.  17,  29),  non  detorquet  a  genuino  sensu.  Hinc  quidem  colligit  praeposterum  esse  si  Deo  imaginem  aliquam  affingamus.  Propheta  vero  sic  a  diffidentia  revocat  Iudaeos,  ut  simul  superstitiones  gentium  condemnet,  atque  alienissimum  a  Deo  esse  ostendat  aut  pingi,  aut  effingi.  Unde  apparet  Pauli  doctrinam  probe  cum  ista  convenire.  Postquam  enim  propheta  Dei  potentiam  immensam  esse  ostendit,  quum  vel  pugillo  omnia  comprehendat,  infert  tandem,  cui  ergo  me  similem  facietis?  nam  quaecunque  effigies  exprimatur,  nihil  mihi  affine  vel  simile  habitura  est.  Utilis  doctrina  et  digna  observatu.  Nam  si  vel  unicus  hic  locus  exstaret,  sufficeret  omnino  ad  refutanda  figmenta,  quibus  se  deludunt  papistae,  quum  sibi  licere  volunt  externis  figuris  repraesentare  Deum.  Negat  propheta  imaginem  posse  ex  mortua  materia  confici,  quae  Dei  gloriae  conveniat.  Palam  idola  reiicit,  necdum  loquitur  de  ipsorum  cultu,  sed  quod  ea  fabricare  et  erigere  per  se  coram  Deo  exsecrandum  et  detestabile  sit.  Scriptura  vero  huiusmodi  testimoniis  referta  est.  Moses  (Deut.  4,  12)  populum  ad  hoc  vitium  proclivem  monebat:  Effigiem  nullam  aut  formam  vidisti  in  monte,  vocem  tantum  audiisti.  Vide  ergo  et  attende  ne  deceptus  ullam  imaginem  tibi  fabrices.  Ergo  ad  cognoscendum  Deum  non  debemus  ipsum  pro  nostra  libidine  effingere,  sed  confugere  ad  verbum,  in  quo  viva  ipsius  imago  nobis  proponitur.  Ea  communicatione  contenti  ne  quid  amplius  ex  nobis  ipsis  audeamus.  Aliae  enim  viae  aut  rationes,  quemadmodum  simulacra  et  imagines,  nos  ad  vanitatem  et  mendacium,  non  ad  veritatem  instituent,  sicut  praeclare  docet  Ieremias  (10,  8):  Eruditio  vanitatum,  lignum.  Et  Habacuc  (2,  18),  Mendacium  est  conflatile  eius.  Quod  autem  Dominus  interdum  sese  leoni,  urso,  homini,  aut  aliis  rebus  comparat,  nihil  ad  imagines,  ut  papistae  arbitrantur:  sed  iis  similitudinibus  aut  humanitas  Dei  et  clementia,  aut  severitas  et  ira,  et  alia  eiusmodi  exprimuntur.  Nec  enim  aliter  Deus  sese  nobis  patefacere  potest,  nisi  ex  similitudine  rerum  quas  novimus.  In  summa,  si  Deo  simulacrum  erigere  aut  statuere  liceret,  hoc  commune  haberet  cum  diis  gentium,  nec  stare  posset  haec  prophetae  sententia.  19  et  20.  {Artifex.)  Quia  magna  vis  eat  publici  consensus,  et  quidquid  multitudini  placet  pro  lege  ducitur:  contra  hunc  errorem  fideles  munit  propheta.  Est  igitur  occupatio  in  his  verbis,  ne  Iudaeos  terreat,  quod  gentes  certatim  studia  sua  conferant  idolis  fingendis,  quia  hoc  modo  alii  alios